आपला जिल्हा ताज्या घडामोडी देश विदेश महाराष्ट्र

🔶वाघाच्या हल्यात गुराखी गंभीर जखमी ; सावंगी (बडगे ) परिसरात भीतीचे वातावरण

Chief EditorJuly 12, 2026

101

धनराज सरपाते- तालुका प्रतिनिधी

सिंदेवाही: (इंडिया २४ न्युज )
नागभीड तालुक्यातील तळोधी वनपरिक्षेत्रात सावंगी (बडगे ) गावाजवळ रविवारी दुपारी बारा वाजण्याच्या सुमारास वाघाने एका गुराख्यास हल्ला करून गंभीर जखमी केल्याची घटना घडली. या घटनेमुळे परिसरात भीतीचे वातावरण निर्माण झाले.

जखमी गुराख्याचे नाव कांचन प्रकाश खोब्रागडे वय ३० वर्ष रा. सावंगी (बडगे ) असे आहे. मिळालेल्या माहितीनुसार, ते नेहमीप्रमाणे स्वतःच्या म्हशी जंगल परिसरात चारण्यासाठी घेऊन गेले होते. यावेळी गोसेखुर्द कालव्याजवळ दबा धरून बसलेल्या वाघाने अचानक हल्ला केला. हल्ल्यात वाघाने गुराख्याला फरफटत नेण्याचा प्रयत्न केला. मात्र त्यांनी आरडाओरडा केल्याने जवळ असलेला रवी वाडगुरे धावून आले. त्यामुळे वाघाने पळ काढल्याचे सांगण्यात आले.

हल्ल्यात जखमी झालेल्या कांचन खोब्रागडे यांना प्रथम तळोधी येथे प्राथमिक उपचार देण्यात आले. त्यानंतर वन विभागाचे अधिकाऱ्यांनी त्यांना उपचारासाठी सिंदेवाही येथील रुग्णालयात दाखल केले. पुढील उपचारार्थ चंद्रपूर येथे हलविले.

गावकऱ्यांच्या म्हणण्यानुसार, यापुर्वीही या परिसरात वाघाच्या हल्ल्यात अनेक जनावरे ठार झाली आहेत. वारंवार घडणाऱ्या घटनांमुळे नागरिकांमध्ये भीतीचे वातावरण असून, संबंधित वाघाचा तातडीने बंदोबस्त करावा अशी मागणी ग्रामस्थांनी केली आहे.

दरम्यान, वनविभागाने घटनेची नोंद घेतली असुन परिसरात गस्त वाढविण्यात आल्याची माहिती मिळाली आहे. तसेच नागरीकांनी जंगल परीसरात जाताना सावधगिरी बाळगावी. असे आवाहन करण्यात आले आहे.