🔸आता महात्मा फुले जन आरोग्य योजनेत ‘यकृत प्रत्यारोपणा’चा समावेश..

राज जांभुळकर : मुख्य कार्यकारी संपादक

राजुरा – ( इंडिया 24 न्युज ) : दि. १० राजुरा विधानसभा क्षेत्राचे सेवाभावी आमदार श्री. देवराव भोंगळे यांनी जनसामान्यांच्या आरोग्यासाठी केलेल्या सातत्यपूर्ण पाठपुराव्याला मोठे यश प्राप्त झाले असून अत्यंत महागड्या आणि सर्वसामान्यांच्या आवाक्याबाहेर असलेल्या यकृत प्रत्यारोपण (Liver Transplant) यांसारख्या गंभीर शस्त्रक्रियांचा समावेश आता महात्मा ज्योतिराव फुले जन आरोग्य योजनेत करण्यात आला आहे.

आमदार देवराव भोंगळे यांनी यासंदर्भात राज्याचे मुख्यमंत्री ना. देवेंद्रजी फडणवीस यांच्याकडे २२ जानेवारी २०२६ रोजी पत्राद्वारे केलेल्या विशेष मागणीची आणि पाठपुराव्याची दखल घेत शासनाने हा महत्वपूर्ण निर्णय घेतला आहे. यामुळे आता यकृत प्रत्यारोपणासाठी तब्बल २२ लाख रुपयांपर्यंतचे उपचार गरजू रुग्णांना या योजनेच्या माध्यमातून मोफत मिळू शकणार आहेत.

यापूर्वी अनेक गंभीर आजारांवर उपचार मिळत असले तरी, अवयव प्रत्यारोपणासारख्या शस्त्रक्रियांचा खर्च लाखांच्या घरात असल्याने गोरगरीब रुग्णांना जीव गमवावा लागत होता. ही बाब लक्षात घेऊन आमदार देवराव भोंगळे यांनी शासन दरबारी या विषयाचा ताकदीने पाठपुरावा केला होता. त्यांच्या या प्रयत्नांना यश आले असून, शासनाने आता विविध अंगीकृत शासकीय रुग्णालयांच्या राखीव निधीमधून या शस्त्रक्रियांचा खर्च उचलण्यास मान्यता दिली आहे. या निर्णयानुसार केवळ यकृत प्रत्यारोपणच नव्हे, तर हृदय प्रत्यारोपण (१५ लाख), फुफ्फुस प्रत्यारोपण (२० लाख) आणि बोन मॅरो ट्रान्सप्लांट यांसारख्या १० प्रकारच्या अत्यंत क्लिष्ट शस्त्रक्रियांचा लाभ आता राज्यातील गोरगरीब जनतेला मिळणार आहे.

आमदार देवराव भोंगळे यांच्या या यशस्वी पुढाकारामुळे राजुरा मतदारसंघासह संपूर्ण राज्यातील हजारो कुटुंबांना मोठा दिलासा मिळाला आहे. “पैशाअभावी कोणाचाही उपचार थांबू नये, हेच आमचे ध्येय असून मा. मुख्यमंत्री देवेंद्रजी फडणवीस यांनी आमच्या विनंतीला मान देऊन हा लोकहिताचा निर्णय घेतल्याबद्दल मी त्यांचा आभारी आहे,” अशा भावना आमदार देवराव भोंगळे यांनी या निर्णयावर व्यक्त केल्या. या निर्णयामुळे आरोग्य क्षेत्रात एक मोठी क्रांती झाली असून, आमदार देवराव भोंगळे यांच्या या कार्यतत्परतेचे सर्व स्तरातून कौतुक होत आहे.