🔸गडचिरोली येथे जिल्हा वर्धापन दिनानिमित्त भव्य वक्तृत्व स्पर्धा व चर्चासत्र उत्साहात संपन्न..

गडचिरोली जिल्हा ब्युरो चीफ : उज्वल देवनाथ

गडचिरोली – ( इंडिया 24 न्युज ) : दि. २६ ऑगस्ट २०२६ गडचिरोली जिल्ह्याच्या वर्धापन दिनाचे औचित्य साधून माजी खासदार तथा भाजप अनुसूचित जमाती मोर्चाचे राष्ट्रीय महामंत्री डॉ. अशोकजी नेते यांच्या मार्गदर्शनाखाली व नेतृत्वात गडचिरोली येथे भव्य वक्तृत्व स्पर्धा व चर्चासत्राचे उत्साहपूर्ण वातावरणात आयोजन करण्यात आले. चामोर्शी रोड, गडचिरोली येथील माजी खासदार डॉ. अशोकजी नेते यांच्या जनसंपर्क कार्यालयात भारतमातेच्या प्रतिमेचे पूजन व दीपप्रज्वलन करून कार्यक्रमाची सुरुवात करण्यात आली.

या कार्यक्रमाचे उत्कृष्ट नियोजन व आयोजन किसान मोर्चा प्रदेश सचिव रमेशजी भुरसे व जेष्ठ नेते डॉ. भारतजी खटी यांच्या माध्यमातून करण्यात आले. ‘गडचिरोली जिल्ह्याची दशा आणि दिशा’ या अत्यंत महत्त्वपूर्ण व चिंतनशील विषयावर आयोजित वक्तृत्व स्पर्धेत जिल्ह्यातील विद्यार्थी, विद्यार्थिनी, तरुण नागरिक तसेच विविध क्षेत्रांतील वक्त्यांनी उत्स्फूर्त सहभाग नोंदवित आपल्या अभ्यासपूर्ण व प्रभावी विचारांची मांडणी केली.

वक्तृत्व स्पर्धेतील उत्कृष्ट वक्त्यांना प्रोत्साहन देण्यासाठी आकर्षक रोख पारितोषिके देऊन गौरविण्यात आले. प्रथम पारितोषिक ₹१५०१, द्वितीय ₹१००१, तृतीय ₹७०१ आणि चतुर्थ ₹५०१ असे पारितोषिकांचे स्वरूप होते. याशिवाय सहभागी स्पर्धकांचे मनोबल वाढविण्यासाठी प्रोत्साहनपर बक्षिसे देण्यात आली. माजी खासदार डॉ. अशोकजी नेते यांच्या सहकार्याने स्पर्धकांना नोटबुक व पेन देऊन त्यांचे कौतुक करण्यात आले.

वक्तृत्व स्पर्धेनंतर आयोजित चर्चासत्रात जिल्ह्यातील विविध राजकीय, सामाजिक व शैक्षणिक क्षेत्रांतील विचारवंत, कार्यकर्ते आणि नागरिकांनी मोठ्या संख्येने उपस्थित राहून गडचिरोलीच्या सर्वांगीण विकासाची सद्यस्थिती, आव्हाने आणि भविष्यातील विकासाची दिशा यावर सखोल चर्चा केली. जिल्ह्याच्या विकासाला अधिक गती देण्यासाठी विविध मुद्द्यांवर उपस्थितांनी आपले विचार व सूचना मांडल्या.

*वक्तृत्व स्पर्धेतील विजेते*

वक्तृत्व स्पर्धेत प्रथम पारितोषिक ओमकांत कृष्णा राऊत, द्वितीय पारितोषिक मानसी कुनघाडकर, तृतीय पारितोषिक निशांत सतीश विधाते, तर चतुर्थ पारितोषिक हिमांशू निलेश मडावी यांनी पटकावले.

तसेच सुधा उद्धव बांगरे, रमेश अधिकारी व दिवाकर गेडाम यांना प्रोत्साहनपर बक्षिसे देऊन गौरविण्यात आले.

बक्षीस वितरण समारंभास प्रामुख्याने आमदार डॉ. मिलिंदजी नरोटे, ज्येष्ठ नेते बाबुरावजी कोहळे, माजी जिल्हाध्यक्ष प्रशांतजी वाघरे, शहराध्यक्ष तथा बांधकाम सभापती अनिल कुनघाडकर, नगराध्यक्ष अॅड. प्रणोती निंबोरकर, जिल्हा उपाध्यक्ष तथा मानवाधिकार संघटनेचे प्रदेशाध्यक्ष डॉ. प्रणय खुणे, नगरपरिषद उपाध्यक्ष निखिल चरडे, सभापती तथा शहराध्यक्ष सीमा कन्नमवार, सभापती हर्षल गेडाम, नगरसेवक अंकुश नैताम, जिल्हा सचिव तथा नगरसेविका वर्षा शेडमाके, शिल्पा गव्हारे, अर्चना निंबोंड, सुधाकर पेटकर, विलास पा. भांडेकर, प्रिती खोब्रागडे, भूपेश कुळमेथे, घनश्याम वाढई, बंडू झाडे, कान्होजी लोहबरे, रमेश नैताम, दतु माकोडे, जनार्दन साखरे, अरुण उराडे, किशोर गटकोजवार,फुलचंद वाघाडे, देवाजी लाटकर,विनोद धर्मपुरीवार यांच्यासह विविध पदाधिकारी, कार्यकर्ते व नागरिक मोठ्या संख्येने उपस्थित होते.

कार्यक्रमाचे प्रास्ताविक कि.मो.प्र.स. रमेशजी भुरसे यांनी केले, तर संचालन डॉ. भारत खटी यांनी केले. वक्तृत्व स्पर्धेचे परीक्षक म्हणून पत्रकार मनोज ताजणे यांनी जबाबदारी पार पाडली.

गडचिरोली जिल्ह्याच्या वर्धापन दिनानिमित्त आयोजित या वक्तृत्व स्पर्धा व चर्चासत्रामुळे युवा पिढीला जिल्ह्याच्या विकासाच्या प्रश्नांवर विचार करण्याची आणि आपले मत प्रभावीपणे मांडण्याची संधी मिळाली. कार्यक्रमाच्या यशस्वीतेसाठी आयोजक, पदाधिकारी व कार्यकर्त्यांनी विशेष परिश्रम घेतले. राष्ट्रगीताने कार्यक्रमाची सांगता करण्यात आली.