🔸पोलीस स्टेशन चामोर्शी येथे सायबर जनजागृती मोहीम; MRM पोर्टल बाबत केले मार्गदर्श..

गडचिरोली जिल्हा ब्युरो चीफ : उज्वल देवनाथ

चामोर्शी – ( इंडिया 24 न्युज ) : सायबर गुन्ह्यांना आळा घालण्यासाठी आणि नागरिकांमध्ये जनजागृती निर्माण करण्यासाठी पोलीस स्टेशन चामोर्शी येथे आज सायबर जनजागृती मोहिमेचे आयोजन करण्यात आले होते.

यावेळी पोलीस निरीक्षक श्री. महादेव ढाकणे यांनी पोलीस स्टेशन येथे उपस्थित सर्व अधिकारी व अंमलदारांना नुकतेच लॉन्च झालेले MRM (Money Recovery Management) पोर्टल बाबत सविस्तर माहिती दिली.

या पोर्टलच्या माध्यमातून ऑनलाईन फसवणूक झाल्यानंतर फसवणुकीची रक्कम कशी गोठवता (Freeze) येते, ती रक्कम परत मिळवण्यासाठी कोणती प्रक्रिया करावी लागते आणि सर्वसामान्य नागरिकांना या पोर्टलचा कसा फायदा होणार आहे, याबाबत त्यांनी सोप्या भाषेत मार्गदर्शन केले.

तसेच आज सकाळी पोलीस स्टेशन चामोर्शीचे भावेश वरगंटीवार , मेजर पौर्णिमा चांदे आणि उ प निरीक्षक ललिता सातव यांनी जे. के. बोमनवार हायस्कूल येथे भेट देऊन विद्यार्थ्यांसाठी विशेष सायबर जनजागृती कार्यक्रम राबविला.

या कार्यक्रमात विद्यार्थी आणि नागरिकांना –
• सायबर फसवणुकीपासून कसे सावध राहावे • म्युल अकाउंट (Mule Account) म्हणजे काय आणि त्यापासून होणारे धोके • अनोळखी लिंक किंवा APK फाईल डाउनलोड केल्याने होणारे गंभीर परिणाम • GRM / MRM पोर्टलचा प्रभावी वापर कसा करावा • हरवलेला किंवा चोरीला गेलेला मोबाईल CEIR पोर्टलद्वारे कसा परत मिळवता येतो
याबाबत सविस्तर माहिती देण्यात आली. ऑनलाईन फसवणूक झाल्यास १९३० या हेल्पलाईन क्रमांकावर किंवा MRM पोर्टलवर तात्काळ तक्रार केल्यास पैसे परत मिळण्याची शक्यता जास्त असते, असे आवाहन यावेळी करण्यात आले.

सायबर गुन्ह्यांचे प्रमाण दिवसेंदिवस वाढत असताना चामोर्शी पोलिसांकडून अशा प्रकारे सातत्याने जनजागृती मोहीम राबवून नागरिकांना सतर्क करण्याचे कौतुकास्पद काम केले जात आहे.