▪️नाट्यस्पर्धा हा महावितरणचा सांस्कृतिक ठेवा, आव्हानात्मक सेवेसोबत कर्मचाऱ्यांकडून कलागुणांचे जतन – श्री. राजेंद्र पवार

राज जांभुळकर : मुख्य कार्यकारी संपादक

चंद्रपूर/गडचिरोली – दि. २२ ऑक्टोबर २०२६: महाराष्ट्राला नाट्यकलेची उज्ज्वल परंपरा आहे. वीज क्षेत्रातील कर्मचाऱ्यांचे काम २४ तास आव्हानात्मक व अविरत सेवा देणारे आहे. या दैनंदिन कामाच्या धकाधकीतही कर्मचाऱ्यांमधील सुप्त कलागुणांना हक्काचे व्यासपीठ मिळावे, यासाठी आयोजित करण्यात येणारी ही नाट्यस्पर्धा म्हणजे महावितरणचा एक मौल्यवान सांस्कृतिक ठेवा आहे, असे प्रतिपादन महावितरणचे संचालक (मानव संसाधन) श्री. राजेंद्र पवार यांनी बुधवारी (दि.२१) केले.
पुणे येथे लोकशाहीर अण्णाभाऊ साठे नाट्यगृहामध्ये महावितरण अंतर्गत ‘आंतर प्रादेशिक राज्यस्तरीय नाट्यस्पर्धा-२०२६’ च्या उद्घाटनप्रसंगी उद्घाटक म्हणून ते बोलत होते. यावेळी कार्यक्रमाचे अध्यक्ष म्हणून कोकण प्रादेशिक विभागाचे सहव्यवस्थापकीय संचालक श्री. दिलीप जगदाळे उपस्थित होते. तर प्रमुख पाहुणे म्हणून मुख्य अभियंते सर्वश्री इब्राहिम मुलाणी, दत्तात्रेय बनसोडे, स्वप्निल काटकर, धर्मराज पेठकर, मिलिंद दिग्रसकर, आयोजन समितीचे अध्यक्ष श्री. ज्ञानदेव पडळकर तसेच मुख्य समन्वयक श्री. संजय ढोके, सहमुख्य औद्योगिक संबंध अधिकारी श्री. ललित गायकवाड यांची उपस्थिती होती.
संचालक श्री. पवार पुढे म्हणाले की, नाटकामुळे कर्मचाऱ्यांमध्ये संवाद कौशल्य व वेळेचे नियोजन यासारखे गुण विकसित होतात आणि हीच सकारात्मक ऊर्जा त्यांच्या कार्यालयीन कामकाजातही दिसून येत आहे. तर अध्यक्षीय मनोगतामध्ये श्री. दिलीप जगदाळे म्हणाले की, महावितरणमधील नाट्यकृतींचे सादरीकरण व्यावसायिक नाटकांच्या तोडीचे आहे आणि महावितरणची ही रंगभूमी नाट्याविष्काराने प्रगल्भ होत आहे. कार्यक्रमाचे प्रास्ताविक प्रभारी मुख्य अभियंता श्री. ज्ञानदेव पडळकर यांनी केले.
या दोन दिवसीय स्पर्धेत चारही प्रादेशिक विभागांतून प्रथम ठरलेल्या नाटकांचे सादरीकरण होणार आहे. यात आजच्या पहिल्या सत्रात कोकण विभागाचे ‘ओल्या भिंती’च्या सादरीकरणाने नाट्य रसिकांना मंत्रमुग्ध केले. त्यानंतर पुणे विभागाचे ‘समोरच्या घरात’ नाट्यकृती सादर होणार आहे. दुसऱ्या दिवशी (दि.२२) छत्रपती संभाजीनगर विभागाचे ‘वारी’, नागपूर विभागाचे ‘थलाई कुथल’ ह्या नाट्यकृती सादर केल्या जाणार आहेत.
सामाजिक व संवेदनशील विषयांवरील या कलाकृतींना उपस्थित प्रेक्षकांकडून उस्फूर्त प्रतिसाद मिळत आहे. सूत्रसंचालन सौ. मृदुला शिवदे व सौ. भक्ती जोशी यांनी केले. तर अधीक्षक अभियंता श्री. सिंहाजीराव गायकवाड यांनी आभार मानले.
फोटो ओळ : १. महावितरणच्या राज्यस्तरीय नाट्यस्पर्धेचे उद्घाटन करताना संचालक (मानव संसाधन) श्री. राजेंद्र पवार, कोकणचे सहव्यवस्थापकीय संचालक श्री. दिलीप जगदाळे व उपस्थित मान्यवर.
२. कोकण प्रादेशिक विभागाने सादर केलेल्या ‘ओल्या भिंती’ या नाट्यकृतीमधील एक प्रसंग