🔸गणेशभक्तांनी बंदीवानांनी तयार केलेल्या पर्यावरणपूरक गणेशमुर्तींची खरेदी करावी: जिल्हाधिकारी जितेंद्र पापळकर

🔸धुळे जिल्हा कारागृह येथे गणेश मुर्तीं विक्री स्टॉलचे उद्धटन संपन्न..

Mr. Tulshiram JambhulkarAugust 26, 2024

मुख्य संपादक तथा संचालक श्री. तुळशीराम जांभूळकर

धुळे, दिनांक 26 ऑगस्ट, 2024 ( इंडिया 24 न्यूज ) : धुळे जिल्हा खुले कारागृहात शिक्षा भोगत असलेल्या बंदीवानांनी पर्यावरणपूरक शाडू मातीच्या गणेश मुर्ती तयार केल्या असून कारागृहाच्या बाहेरील विक्री केंद्रावर त्या विक्रीसाठी उपलब्ध करुन देण्यात आल्या आहेत. धुळेकर गणेशभक्तांनी या पर्यावरणपूरक शाडूच्या श्री गणेशमुर्तींची खरेदी करुन पर्यावरणपुरक गणेशोत्सव साजरा करावा, असे आवाहन जिल्हाधिकारी जितेंद्र पापळकर यांनी केले आहे.

आज धुळे जिल्हा खुले कारागृह येथे श्री गणेशमुर्तींचे प्रदर्शन व विक्री स्टॉलचे उद्धटन जिल्हाधिकारी श्री. पापळकर यांच्या हस्ते संपन्न झाले, यावेळी ते बोलत होते. यावेळी जिल्हा पोलीस अधिक्षक श्रीकांत धिवरे, धुळे जिल्हा कारागृह अधिक्षक एकनाथ शिंदे, वरिष्ठ तुरुंगअधिकारी विशाल बांदल, उप वरिष्ठ तुरुंगाधिकारी सचिन जिजुंर्डे, शिक्षक मनोहर भदाणे, सुभेदार पांडुरंग चौरे, सरदार सुभेदार सेंट अँथनी स्कुलचे प्राचार्य फादर विल्सन रॉड्रीक्स आदी उपस्थित होते.

जिल्हाधिकारी श्री. पापळकर म्हणाले की, अवघ्या बारा दिवसांवर यंदाचे गणपतीचे आगमन लक्षात घेता धुळे जिल्हा खुले कारागृहात शिक्षा भोगत असलेल्या बंदीवानांनी कारागृह प्रशासनाच्या सहकार्याने आपल्या हातानी विविध प्रकारच्या पर्यावरण पूरक शाडू मातीच्या 500 सुबक गणेशमुर्ती तयार केल्या आहेत. या गणेशमूर्तीची किंमत अतिशय माफक अशी आहे. मागील वर्षी कारागृहातील बंदीवानांनी 101 मूर्ती तयार केल्या होत्या यावर्षी 500 मूर्ती येथील बंदीवानांनी तयार केल्या असून या मूर्तीं खरेदीसाठी नागरिकांचा चांगला प्रतिसाद लाभत असून या मूर्ती विक्रीच्या माध्यमातून बंदीवांनाना मदत होणार आहे. तसेच नागरिकांनाही अशा सुबक मूर्ती अंत्यत वाजवी दरात उपलब्ध होणार आहे. त्यामुळे धुळे जिल्ह्यातील गणेश भक्तांनी तसेच नागरिकांनी येथील पर्यावरणपूरक अशा शाडू मातीच्या मूर्तीची खरेदी करुन आपल्या घरात या मूर्तीची स्थापना करावी, असे आवाहन जिल्हाधिकारी श्री. पापळकर यांनी केले आहे.

*या गणेशमूर्ती विक्रीसाठी उपलब्ध*

या विक्री केंद्रावर लालबाग गणेश मूर्ती, गरुड गणेश मूर्ती, दगडूशेठ गणेश मूर्ती, कमल गणेश मूर्ती, टिटवाळा गणेश मूर्ती, गादी गणेश मूर्ती, बालगणेश मूर्ती, मोरेश्वर गणेश मूर्ती, गाय गणेश मूर्ती, राजा फर्निचर गणेश मूर्ती, वक्रतुंड गणेश मूर्ती, लड्डू गणेश मूर्ती, आसन गणेश मूर्ती, फेटा गणेश मूर्ती, मुशक वाहन गणेश मूर्ती, लंबोदर गणेश मूर्ती, सुपारी गणेश मूर्ती, श्री. गाय, रामअवतार व दगडूशेठ गणेश मूर्ती आदी प्रकारच्या गणेशमूर्ती कारागृहात विक्रीसाठी उपलब्ध करण्यात आल्या आहेत. या मूर्तींची किंमत चारशे एक रुपयांपासून ते पाच हजार शंभर रुपयांपर्यंत आहे. उद्घाटनावेळीच या मुर्तींच्या खरेदीसाठी कारागृहाच्या विक्री केंद्रावर भाविक मोठ्या संख्येने गर्दी करीत आहेत.