🔸धुळ्यात 7 डिसेंबरला ध्वजदिन निधी संकलनाचा शुभारंभ..

🔸वीरपत्नी, वीरमाता, वीरपितांचा होणार सत्कार..

Mr. Tulshiram JambhulkarNovember 28, 2022

संपादक – शिल्पा बनपूरकर

धुळे, दि. 28 (जिमाका वृत्तसेवा) : दरवर्षी 7 डिसेंबर हा सशस्त्र सेना ध्वज दिन म्हणून देशभरात साजरा केला जातो. या दिवसापासून सर्व राज्ये आजी/माजी सैनिकांच्या कल्याणासाठी जनतेकडून निधी गोळा करतात. जनतेने सैनिकांप्रति त्यांनी केलेल्या त्यागाची कृतज्ञता व्यक्त करण्याचा हा दिवस आहे. धुळे जिल्ह्याचा सशस्त्र सेना ध्वजदिन 2022 निधी संकलनाचा शुभारंभ 7 डिसेंबर, 2022 रोजी सकाळी 11.30 वा. नियोजन सभागृह, जिल्हाधिकारी कार्यालय, धुळे येथे आयोजित केला आहे. अशी माहिती संजय गायकवाड, निवासी उपजिल्हाधिकारी तथा जिल्हा सैनिक कल्याण अधिकारी, धुळे यांनी दिली आहे.
धुळे जिल्ह्यात या कार्यक्रमाचा शुभारंभ जिल्हाधिकारी जलज शर्मा यांच्या अध्यक्षतेखाली होणार असून या कार्यक्रमास जिल्हा परिषदेच्या मुख्य कार्यकारी अधिकारी बुवनेश्वरी एस. पोलीस अधिक्षक संजय बारकुंड, सहायक जिल्हाधिकारी तृप्ती धोडमिसे, महापालिका आयुक्त देविदास टेकाळे, प्र. अपर जिल्हाधिकारी गोविंद दाणेज, उपविभागीय अधिकारी, शिरपुर भाग, शिरपुर प्रमोद भामरे, जिल्हा माहिती अधिकारी विलास बोडके यांची प्रमुख उपस्थिती राहणार आहे.
यावेळी जिल्ह्यातील वीरपत्नी, वीरमाता/वीरपिता यांचा सत्कार करण्यात येणार आहे. तसेच मागील वर्षी उत्कृष्ट ध्वजदिन निधी संकलन केलेल्या अधिकारी व कर्मचारी यांना प्रोत्साहनपर सन्मानपत्र देवून गौरविण्यात येणार आहे. तरी जिल्ह्यातीली माजी सैनिक व त्यांचे कुटुंबियांनी तसेच ध्वजदिन निधी संकलनाचे उत्कृष्ट कार्य केलेल्या सर्व शासकीय/ निम शासकीय अधिकारी व कर्मचारी यांनी कार्यक्रमास उपस्थित रहावे. असे आवाहन श्री. गायकवाड यांनी केले आहे.