🔸राष्ट्रीय लोक आंदोलन न्यासाच्या अकोला जिल्हाध्यक्षपदी गजानन हरणे

*🔸सौ शिल्पा बनपुरकर*
*🔸संपादक*
*🔸मो नं. 7030292628*

अकोला – ( इंडिया 24 न्युज ) : गाव, समाज आणि राष्ट्राच्या विकासाला पोखरणाऱ्या भ्रष्टाचाराविरोधात सनदशीर मार्गाने लोकशक्ती उभी करण्याचे कार्य करणाऱ्या ज्येष्ठ समाजसेवक अण्णा हजारे प्रणित राष्ट्रीय लोक आंदोलन न्यासाच्या अकोला जिल्हाध्यक्षपदी समाजसेवक गजानन कुसुम ओंकारराव हरणे यांची नियुक्ती करण्यात आली आहे. राळेगणसिद्धी येथील राष्ट्रीय लोक आंदोलन न्यासाच्या केंद्रीय विश्वस्त मंडळाने त्यांच्या संघटनात्मक, सामाजिक कार्याचा आढावा घेऊन ही नियुक्ती केली आहे. राष्ट्रीय लोक आंदोलन न्यासाचे अध्यक्ष पद्मभूषण अण्णासाहेब हजारे यांच्या नेतृत्वाखाली भ्रष्टाचारमुक्त, स्वावलंबी आणि लोकसहभागावर आधारित भारताच्या निर्मितीसाठी लोकआंदोलनाचे कार्य विविध पातळ्यांवर सुरू आहे. महात्मा गांधींच्या ग्रामस्वराज्याच्या संकल्पनेला कृतीची जोड देत गावाच्या विकासाबरोबरच प्रशासनातील भ्रष्टाचाराला आळा घालणे, नागरिकांमध्ये निर्भयता निर्माण करणे आणि सनदशीर मार्गाने अन्यायाविरुद्ध संघर्ष करण्यासाठी कार्यकर्त्यांची फळी उभी करणे, ही या चळवळीची प्रमुख दिशा आहे.
गजानन हरणे यांनी मागील वर्षभरात अकोला जिल्ह्यात संघटन बांधणीची जबाबदारी स्वीकारून विविध सामाजिक प्रश्नांवर सक्रिय भूमिका घेतली. त्यांच्या कार्याचा अहवाल जिल्ह्यासाठी नियुक्त विश्वस्त निरीक्षकांनी केंद्रीय कार्यालयाकडे सादर केला. त्यानंतर विश्वस्त मंडळाने अकोला जिल्ह्यात बैठक घेऊन संघटनात्मक परिस्थितीचा आढावा घेतला. केंद्रीय कार्यालयात झालेल्या विश्वस्तांच्या आढावा बैठकीत झालेल्या निर्णयानुसार गजानन हरणे यांच्यावर जिल्हाध्यक्षपदाची जबाबदारी सोपविण्यात आली आहे.
संघटन विस्ताराचे आव्हान
नियुक्तीपत्रानुसार, जिल्हाध्यक्ष म्हणून गजानन हरणे यांच्यावर अकोला जिल्ह्यात सामाजिक व राष्ट्रीय बांधिलकी असलेल्या कार्यकर्त्यांचे संघटन उभारण्याची महत्त्वपूर्ण जबाबदारी आहे. अनुभवी कार्यकर्त्यांसोबत तरुण आणि महिलांना संघटनेत सक्रिय सहभागी करून घेण्याचे प्रयत्न करणे अपेक्षित आहे. कार्यकर्त्यांची सामाजिक पार्श्वभूमी, चारित्र्य आणि संघटनेच्या उद्दिष्टांशी असलेली बांधिलकी यांची योग्य पडताळणी करून संघटन मजबूत करण्याचे निर्देश देण्यात आले आहेत.
जिल्ह्यातील कार्यक्षम कार्यकर्त्यांच्या विचारविनिमयातून उपाध्यक्ष, सचिव, सहसचिव आणि खजिनदार यांचा समावेश असलेली जिल्हा समिती गठित करण्यात येणार आहे. त्याचबरोबर अकोला जिल्ह्यातील प्रत्येक तालुक्यात दौरे करून तालुकास्तरीय बैठका घेणे, स्थानिक कार्यकर्त्यांना विश्वासात घेणे आणि तालुका समित्या स्थापन करून त्यांना केंद्रीय विश्वस्त मंडळाची अंतिम मंजुरी मिळवून देणे, अशी संघटनात्मक प्रक्रिया राबविण्यात येणार आहे.
लोकशक्तीच्या संघटनाला प्राधान्य
लोकशाही केवळ मतदानाच्या दिवशी जागी होणारी व्यवस्था नसून, अन्याय आणि भ्रष्टाचाराविरुद्ध नागरिकांनी निर्भयपणे प्रश्न विचारण्याची सातत्यपूर्ण प्रक्रिया आहे. या भूमिकेतून राष्ट्रीय लोक आंदोलन न्यासाने उभारलेल्या चळवळीला अकोला जिल्ह्यात व्यापक लोकसहभाग मिळवून देण्याचे आव्हान आता गजानन हरणे यांच्यासमोर आहे.
ग्रामविकास, पारदर्शक प्रशासन, भ्रष्टाचारविरोध, नागरिकांचे अधिकार आणि लोकसहभागी लोकशाही या विषयांवर संघटित जनजागृती करण्यासाठी कार्यकर्त्यांची प्रभावी फळी उभारणे ही काळाची गरज आहे. त्यामुळे गजानन हरणे यांची नियुक्ती ही केवळ एका पदाची जबाबदारी नसून लोकशक्तीला संघटित करण्याची आणि सामान्य नागरिकांच्या प्रश्नांना सनदशीर आंदोलनाची दिशा देण्याची जबाबदारी मानली जात आहे.दरम्यान, संघटनेत सहभागी होणाऱ्या कार्यकर्त्यांचे सभासद अर्ज केंद्रीय कार्यालयाने निर्धारित केलेल्या नमुन्यात भरून घेऊन मंजुरीसाठी पाठविण्याचे निर्देशही देण्यात आले आहेत.
गजानन हरणे यांच्या नियुक्तीमुळे अकोला जिल्ह्यात “निर्भय नागरिक, जागृत समाज आणि भ्रष्टाचारमुक्त प्रशासन” या दिशेने लोकशक्तीची नवी संघटनात्मक वाटचाल सुरू होण्याची अपेक्षा व्यक्त होत आहे. त्यांच्या नियुक्तीबद्दल सामाजिक, राजकीय,पत्रकारिता आणि लोकआंदोलन क्षेत्रातून अभिनंदन व्यक्त होत आहे. तसेच त्यांच्यावर विविध क्षेत्रातील मान्यवरांकडून शुभेच्छांचा वर्षाव होत आहे. त्यांनी आपल्या नियुक्तीचे श्रेय राष्ट्रीय लोक आंदोलनाच्या कार्याध्यक्ष कल्पना इमानदार , खजिनदार दत्ता आवारी तसेच सर्व विश्वस्त मंडळांन सह जिल्ह्यातील सर्व कार्यकर्त्यांना दिले आहे.