🔸अपघातात चिमुकल्यांना गमावलेल्या चौधरी कुटुंबाला मुख्यमंत्री सहायता निधीतून २ लाखांची मदत..!

राज जांभुळकर : मुख्य कार्यकारी संपादक

गोंडपिपरी – ( इंडिया 24 न्युज ) दि. २८ तालुक्यातील घडोली येथील चौधरी कुटुंबावर ओढवलेल्या दुर्दैवी प्रसंगात, आमदार देवराव भोंगळे यांनी संवेदनशीलतेने केलेल्या पाठपुराव्याला मोठे यश मिळाले आहे. भीषण अपघातात आपली दोन्ही मुले गमावलेल्या सुधीर चौधरी यांच्या कुटुंबाला मुख्यमंत्री सहाय्यता निधीतून २ लाख रुपयांची आर्थिक मदत मंजूर करण्यात आली आहे.

घडोली येथील रहिवासी श्री. सुधीर चौधरी हे ३१ जानेवारी २०२५ रोजी आपल्या पत्नी सौ. शिवानी आणि दोन मुलांसह दुचाकीने नजीकच्या श्रीक्षेत्र धाबा येथील यात्रेकरिता जात होते. या प्रवासादरम्यान त्यांच्या दुचाकीला भीषण अपघात झाला. या दुर्घटनेत सुधीर चौधरी आणि त्यांची पत्नी गंभीर जखमी झाले, तर त्यांची दोन्ही मुले धिरज (४ वर्षे) आणि विरज (२ वर्षे) यांना आपले प्राण गमवावे लागले. अवघ्या दोन वर्षांच्या विराजचा वाटेतच मृत्यू झाला, तर चार वर्षांच्या धिरजची उपचारादरम्यान सावंगी (मेघे) येथे प्राणज्योत मालवली. या घटनेमुळे चौधरी कुटुंबावर दुःखाचा डोंगर कोसळला होता.

*🔸आमदार देवराव भोंगळे यांची तत्परता आणि पत्रव्यवहार*

चौधरी कुटुंबाची आर्थिक परिस्थिती अत्यंत हलाकीची असल्याने त्यांना शासनाकडून मदतीची नितांत गरज होती. ही बाब लक्षात घेता, आमदार देवराव भोंगळे यांनी तातडीने राज्याचे कर्तव्यदक्ष मुख्यमंत्री ना. देवेंद्रजी फडणवीस यांना पत्र पाठवून या कुटुंबाला आर्थिक मदत देण्याची मागणी केली होती. “हा प्रसंग अत्यंत हृदयद्रावक असून, कुटुंबाला सावरण्यासाठी शासनाच्या आधाराची गरज आहे,” असे त्यांनी आपल्या पत्रात नमूद केले होते.
त्यानुसार आमदार भोंगळे यांच्या विनंतीची तातडीने दखल घेत, मुख्यमंत्री ना. देवेंद्र फडणवीस यांनी मानवतावादी दृष्टीकोनातून ही ‘विशेष बाब’ मानत मदत जाहीर केली आहे. यानुसार, मृत बालकांच्या वारसास (चौधरी कुटुंबाला) प्रत्येकी १,००,०००/- (एक लाख रुपये) याप्रमाणे एकूण २,००,०००/- (दोन लाख रुपये) अर्थसहाय्य मंजूर करण्यात आले आहे.

याबाबतचे अधिकृत पत्र मुख्यमंत्री कार्यालयाकडून चंद्रपूर जिल्हाधिकारी कार्यालयाला २७ डिसेंबर रोजी प्राप्त झाले आहे. या मदतीमुळे शोकाकुल चौधरी कुटुंबाला दुःखातून सावरण्यासाठी मोठा आर्थिक आधार मिळणार आहे.