🔶सिंदेवाहीतील बँक ऑफ महाराष्ट्र शाखेत ग्राहकांच्या गैरसोयी ; मूलभूत सुविधांची नागरिकांकडून मागणी

धनराज सरपाते- सिंदेवाही तालुका प्रतिनिधी

सिंदेवाही : ( इंडिया २४ न्युज )
सिंदेवाही शहरातील बँक ऑफ महाराष्ट्र शाखेत वाढत्या ग्राहकसंखेमुळे दररोज मोठी गर्दी होत असून, अपुऱ्या जागा व मूलभूत सुविधांच्या अभावामुळे ग्राहकांना विविध गैरसोयीचा सामना करावा लागत आहे. या संदर्भात नागरिकांनी शाखेतील सुविधा तातडीने वाढविण्याची मागणी केली आहे.

सिंदेवाही तालुक्यातील सुमारे ५० हजाराहून अधिक ग्राहक या शाखेवर अवलंबून आहेत. यापूर्वी वासेरा, कळमगाव आणि सिंदेवाही अशा तीन शाखा कार्यरत होत्या. मात्र, वासेरा आणि कळमगाव शाखांचे सिंदेवाही शाखेत विलनीकरण झाल्यानंतर येथील ग्राहक संख्या मोठ्या प्रमाणात वाढली आहे. त्यामुळे सध्याची इमारत अपुरी पडत असून ग्राहकांना दीर्घकाळ रांगेत उभे राहावे लागत आहे.

शाखेत आर्थिक व्यवहारासाठी केवळ एकच काउंटर कार्यरत असल्याने कामकाजास विलंब होत असल्याची ग्राहकांची तक्रार आहे. कर्मचारी संख्या अपुरी असल्याने वेळेवर सेवा मिळण्यात अडचणी येत असल्याचेही नागरिकांनी सांगितले. तसेच दिव्यांगासाठी स्वतंत्र काउंटर नसल्याने त्यांनाही त्रास सहन करावा लागत आहे.

शाखेत स्वच्छ पिण्याच्या पाण्याची, ग्राहकांसाठी स्वच्छतागृह तसेच पार्किंगची सुविधा नसल्याने ग्राहकांची गैरसोय होत आहे. वृद्ध, दिव्यांग तसेच विविध शासकीय योजनांचे लाभार्थी तासन्तास शाखेबाहेर थांबण्यास मजबूर होत असल्याचे चित्र आहे.

ग्राहकांनी, शाखेसाठी प्रशस्त इमारत उपलब्ध करून देणे, कर्मचारी संख्या वाढविणे, अतिरिक्त व्यवहार काउंटर सुरू करणे, दिव्यांगासाठी स्वतंत्र काउंटर, स्वच्छ पिण्याचे पाणी, स्वच्छतागृह आणि पार्किंगची सुविधा उपलब्ध करून देण्याची मागणी केली आहे.

▪️” सिंदेवाही शाखेसाठी नवीन व प्रशस्त इमारत उपलब्ध करून देण्याचे प्रयत्न सुरू आहेत. ग्राहकांना अधिक चांगली सेवा देण्यासाठी बँक प्रशासन प्रयत्नशील आहे.”▪️
— चंदू शेंडे शाखा व्यवस्थापक बँक ऑफ महाराष्ट्र, सिंदेवाही.