▪️कृषि क्षेत्रात जागतिक अनुभवासाठी शेतकऱ्यांना परदेशात जाण्याची संधी..

राज जांभूळकर – मुख्य कार्यकारी संपादक

धुळे, दिनांक 25 जुलै 2025 ( इंडिया 24 न्युज ) : शेतीच्या क्षेत्रात सातत्याने होणारे जागतिकस्तरावरील बदल व तंत्रज्ञानाचा वापर शेतकऱ्यांपर्यंत पोहोचावा, यासाठी राज्यातील शेतकऱ्यांसाठी परदेश अभ्यास दौऱ्याची योजना राबविण्यात येत आहे. धुळे जिल्ह्यातून एकूण 5 शेतकऱ्यांना यंदा परदेश अभ्यास दौऱ्यासाठी पाठविण्यात येणार आहे. या योजनेचा लाभ घेण्यासाठी शेतकऱ्यांनी 30 जुलै 2025 पर्यंत अर्ज नजिकच्या तालुका कृषि अधिकारी कार्यालयात सादर करावेत.

राज्यातील शेतकऱ्यांचे केवळ उत्पादन व उत्पादकता वाढविणे हेच ध्येय नसून, शेतमालाची दर्जात्मक सुधारणा करणे आणि त्यासाठी नवीन तंत्रज्ञानाचा अवलंब करणे गरजेचे आहे. यासाठी कृषि विभागामार्फत परदेश अभ्यास दौऱ्यांची योजना राबवली जात असून, महिला शेतकरी – 1, केंद्र व राज्य कृषि पुरस्कार विजेते/पिकस्पर्धा विजेते शेतकरी – 1 व इतर शेतकरी – 3 अशा प्रकारे एकूण 5 शेतकऱ्यांची धुळे जिल्ह्यातून निवड केली जाणार आहे.

*पात्रतेचे निकष :*

अर्जदार हा स्वतः शेतकरी असावा व त्याचे मुख्य उत्पन्नाचे साधन शेती असावे.

7/12 व 8-अ उतारे (मागील सहा महिन्यांतील) आवश्यक.

शेतकरी ॲग्रीस्टॅक शेतकरी आयडी अनिवार्य.

शेतकरी कुटुंबामधील एकाच व्यक्तीला या योजनेचा लाभ घेता येईल. निवडलेल्या शेतकऱ्याने स्वखर्चाने जरी इतर नाही कुटूंब सदस्यास सोबत घ्यावयाचे असेल तरी सहल व्यवस्थापनास येणाऱ्या अडचणीमुळे त्यास परवानगी दिली जाणार नाही.

अर्जदाराचे वय 25 वर्षे पूर्ण असावे.कमाल वयाची अट नाही.

वैध पासपोर्ट असणे आवश्यक. (मुदत किमान 3 महिने शिल्लक असावी.)

शारीरिकदृष्ट्या तंदुरुस्त असल्याचे वैद्यकीय प्रमाणपत्र (किमान एम.बी.बी.एस डॉक्टरचे) आवश्यक.

अर्जदार शासकीय/निमशासकीय/खाजगी नोकरीत, तसेच डॉक्टर, वकील, सीए, अभियंता, कंत्राटदार नसावा.

यापूर्वी कोणत्याही शासकीय/खाजगी संस्थेमार्फत परदेश दौऱ्यावर गेलेला नसावा.

शेतकऱ्यांची अभ्यास दौऱ्यासाठी निवड आल्याचे पत्र कृषि विभागाकडून मिळाल्यानंतर देखील शेतकरी शारीरिकदृष्ट्या तंदुरुस्त असणे बाबतचे वैद्यकीय प्रमाणपत्र तसेच कोरोना विषयक तपासणी व कोणत्याही संसर्गजन्य रोगाची लागण झाली नसलयाचे डॉक्टरांनी प्रमाणित करणे बंधनकारक राहील.

*अनुदानाचा तपशील :*

शासनामार्फत अभ्यास दौऱ्याकरिता एकूण खर्चाच्या 50 टक्के रक्कम किंवा कमाल १ लाख रुपये (जे कमी असेल ती रक्कम) यापैकी कमी असेल ती रक्कम अनुदान स्वरूपात दिली जाईल.

*अर्जासोबत आवश्यक कागदपत्रे :*

विहित नमुन्यातील अर्ज व स्वयंघोषणापत्र
पासपोर्ट प्रत
7/12 व 8-अ उताऱ्यांची मूळ प्रत
शिधापत्रिकेची झेरॉक्स
वैद्यकीय प्रमाणपत्र
आधारकार्ड झेरॉक्स

शेतकऱ्यांनी आपले अर्ज 30 जुलै 2025 पर्यंत नजिकच्या तालुका कृषि अधिकारी कार्यालयात सादर करावेत. अधिक माहितीसाठी तालुका कृषि अधिकारी, उपविभागीय कृषि अधिकारी तसेच जिल्हा अधिक्षक कृषि अधिकारी कार्यालयाशी संपर्क साधावा. असे आवाहन जिल्हा अधिक्षक कृषि अधिकारी सुरज जगताप यांनी केले आहे.