🔸आमदार देवराव भोंगळे यांच्या वाढदिवसानिमित्त जिल्ह्यात २६ ठिकाणी महारक्तदान शिबीर.

*🔸सौ. शिल्पा बंनपुरकर*
*🔸संपादक*
*🔸मो नं. 7030292628*

राजुरा – ( इंडिया 24 न्युज ) दि. २२ राजुरा विधानसभा मतदारसंघाचे लोकप्रिय आमदार श्री. देवराव भोंगळे यांच्या वाढदिवसानिमित्त काल (दि. २१) त्यांच्या मित्रपरिवाराने आयोजित केलेल्या रक्तदान शिबिराने आपल्या सेवाभावी परंपरेतील २१ वे वर्ष पूर्ण केले.
चंद्रपूर आणि यवतमाळ जिल्ह्यांत एकूण २६ ठिकाणी आयोजित करण्यात आलेल्या या महारक्तदान शिबीरांमध्ये ५३०२ रक्तदात्यांनी सहभाग नोंदवल्याने आरोग्य सेवेतील रक्ताची निकड पूर्ण करण्यास मोठा हातभार लागणार असून नागरिकांचा मिळालेला उत्स्फूर्त प्रतिसाद सामाजिक बांधिलकीचे दर्शन घडवणारा ठरला.

ठिकठिकाणी पार पडलेल्या रक्तदान शिबीरांमध्ये घुग्घूस शहरातील शिबिरात १२४६, राजुरा येथे ६९४, पाचगांव (ता. राजुरा) येथे १२०, देवाडा (ता. राजुरा) येथे १०८, गडचांदूर येथे ११३, पाटण (ता. जिवती) येथे १०१, जिवती येथे १११, पारडी (ता. कोरपना) येथे १२९, कोरपना येथे २५८, वनसडी (ता. कोरपना) येथे १०७, नारंडा (ता. कोरपना) येथे १७५, बिबी (ता. कोरपना) येथे १५३, नांदा फाटा (ता. कोरपना) येथे २२५, कवठाळा (ता. कोरपना) येथे २६२, वरोडा (ता. राजुरा) येथे ८२, चंदनखेडा (ता. भद्रावती) ७५, चंद्रपूरातील बंगाली कॅम्प येथे १५०, चिंतलधाबा (ता. पोंभुर्णा) १६०, गोंडपिपरी २२१, भं. तळोधी (ता. गोंडपिपरी) १२४, धाबा (ता. गोंडपिपरी) ९७, तोहोगांव (ता. गोंडपिपरी) १६३ आणि विरूर स्टे. (ता. राजुरा) येथे आयोजित रक्तदान शिबिरात ८४ तर यवतमाळ जिल्ह्यातील मुकुटबन येथे ८० आणि वणी येथे २०१ रक्तदात्यांनी स्वेच्छा रक्तदान केले.

🔸तुमच्या प्रेमाचा उतराई होणे अशक्य! – आमदार देवराव भोंगळे

या विक्रमी महारक्तदानाच्या यशस्वी आयोजनानंतर ठिकठिकाणी आभारपर बोलतांना आमदार देवराव भोंगळे म्हणाले की, आज माझ्या वाढदिवसानिमित्त रक्तदानासारखे पुण्यकर्म करून राष्ट्रसेवेत योगदान देणाऱ्या सर्व रक्तदात्यांचे मी सर्वप्रथम विशेष आभार मानतो. तुमच्या या प्रेमामुळेच मागील २१ वर्षांपासून राष्ट्रसेवेचा हा उपक्रम सातत्याने यशस्वी होत आहे. तुमच्या प्रेमाचा आणि दिलेल्या योगदानाची उतराई होणे अशक्य आहे. आज चंद्रपूर जिल्हा व परीसरात एकुण २६ ठिकाणी हे महारक्तदान शिबीरे पार पडत आहेत. प्रचंड मोठ्या संख्येने रक्तदानासाठी रक्तदात्यांची गर्दी दिसत आहे, आजचा महारक्तदानाच्या संकल्पाचा हा दिवस सामाजिक बांधिलकीचा आणि ऐक्याचा उत्सव ठरत आहे; त्यासाठी योगदान देणार्‍या सर्वांचा मी आयुष्यभर ऋणी राहील.

पुढे बोलताना, मी आयोजक मित्रपरिवाराच्या मेहनतीचे कौतुक करून त्यांचेही विशेष आभार व्यक्त करतो. जेव्हा माणसाचे आयुष्य संकटात असते, तेव्हा त्याला पैशाची नाही, तर रक्ताची गरज असते. रक्त हे कोणत्या फॅक्टरीमध्ये तयार होत नाही, ते विकत सुद्धा घेता येत नाही; ते केवळ तुमच्या आणि माझ्यासारख्या संवेदनशील माणसांच्या शरीरातूनच मिळू शकते. तुमचा एक बाॅटल रक्त भविष्यात एका लहान मुलाचे, एका अपघातग्रस्ताचे, एका प्रसूतीसाठी संघर्ष करणाऱ्या मातेचे प्राण वाचवू शकते; हे समाधानच खरंतर अवर्णनीय आहे, असेही ते म्हणाले.