🔸माजरी येथील केंद्रीय विद्यालयात वार्षिक स्नेहसंमेलन साजरा..!

राज जांभुळकर : मुख्य कार्यकारी संपादक

माजरी : ( इंडिया 24 न्युज ) – के. व्ही. डब्ल्यू. सी. एल. न्यू माजरी येथे वार्षिक स्नेहसंमेलन उत्साहात साजरा करण्यात आला . वार्षिक स्नेहसंमेलनाचा कार्यक्रम मोठ्या उत्साहात आणि आनंदाच्या वातावरणात आयोजित करण्यात आला. कार्यक्रमाची सुरुवात दीपप्रज्वलन व सरस्वती वंदनेने झाली . त्यानंतर प्राचार्य श्री मनोज यादव सर यांनी प्रमुख पाहुणे व डब्ल्यू. सी. एल. न्यू माजरी येथील मान्यवरांचे स्वागत केले आणि क्रीडा, शैक्षणिक इत्यादी विविध क्षेत्रांतील विद्यालयाच्या उल्लेखनीय कामगिरीचा आढावा घेणारा वार्षिक अहवाल सादर केला. या प्रसंगी विद्यालयातील विद्यार्थ्यांनी आपल्या देशातील विविध राज्यांच्या संस्कृतीवर आधारित लोकनृत्ये सादर केली . इयत्ता दहावी व बारावीच्या बोर्ड परीक्षांमध्ये उल्लेखनीय यश संपादन केलेल्या विद्यार्थ्यांचा व शिक्षकांचा प्रमुख पाहुण्यांच्या हस्ते सन्मान करण्यात आला .
प्रमुख पाहुणे श्री. राकेश प्रसाद साहेब क्षेत्रीय महाव्यवस्थापक, डब्ल्यू. सी. एल. माजरी क्षेत्र व शालेय व्यवस्थापन समिती न्यू माजरीचे अध्यक्ष यांनी बोर्ड परीक्षांच्या निकालाची गुणवत्ता वाढवण्यासाठी शिक्षकांनी केलेल्या प्रयत्नांचे कौतुक केले . त्यांनी पालक व विद्यार्थ्यांनी केवळ गुणांवरच नव्हे तर कौशल्ये व मूल्यांवरही लक्ष केंद्रित करावे , असे प्रतिपादन केले तसेच विद्यार्थ्यांनी देशाचे जबाबदार नागरिक बनावे असा सल्ला दिला . देशभक्तीपर नृत्ये, मूकनाट्य व लघुनाट्य यांच्या सादरीकरणामुळे कार्यक्रम अधिक रंगतदार झाला. या सादरीकरणांतून महत्त्वपूर्ण सामाजिक संदेश देण्यात आला तसेच विद्यार्थ्यांची सर्जनशीलता अधोरेखित झाली . कार्यक्रमाचे सूत्रसंचालन शिक्षक श्री. एन. बी. तारू, सुचिता माटे व मयूर उरेवार तसेच विद्यार्थ्यांनी केले . श्री. सुरेश मान सर यांनी आभारप्रदर्शन केले आणि राष्ट्रगीताने कार्यक्रमाची सांगता करण्यात आली .