🔸तीन मुक्तांची आई आदिशक्ती मुक्ताई!! भागवताचार्य ज्ञानेश्वर महाराज वाघ

*🔸सौ. शिल्पा बंनपुरकर*
*🔸संपादक*
*🔸मो नं. 7030292628*

अकोला – ( इंडिया 24 न्युज ) : वारकरी संप्रदायाच्या संतपरंपरेतील आदिशक्ती मुक्ताई या केवळ संत मुक्ताबाई नसून निवृत्तीनाथ, संत ज्ञानेश्वर महाराज आणि संत सोपानदेव या तीन मुक्तांची आईच असल्याचा भावपूर्ण आणि चिंतनात्मक विचार भागवताचार्य ज्ञानेश्वर महाराज वाघ यांनी मांडला.
स्थानिक जिल्हा परिषद नगर, खडकी परिसरातील श्रीसंत गजानन महाराज व हनुमान मंदिरात आयोजित भावकथा निरूपण सप्ताह प्रसंगी ते कीर्तनात बोलत होते. या सप्ताहात ग्रंथराज ज्ञानेश्वरीचे उपासक श्रीयुत भानुदास महाराज सखारामपुरकर यांच्या मुखारविंदातून भावकथा निरूपण सुरू असून, मकर संक्रांतीच्या पूर्वसंध्येला सादर झालेल्या कीर्तनाने भाविकांना मंत्रमुग्ध केले.
भागवताचार्य वाघ यांनी सांगितले की, विठ्ठलपंत व रुक्मिणी देवी यांच्या बलिदानानंतर आळंदी येथील सिद्ध बेटातील गवताच्या कुटीत निवृत्तीनाथ, ज्ञानोबाराय व सोपानकाका या तिन्ही भावंडांसोबत मुक्ताबाई वास्तव्यास होत्या. भिक्षा मागून आणलेल्या कोरड्या अन्नाचे मिष्ठान्न बनवून देत, मायेने, वात्सल्याने व त्यागाने त्यांची सेवा करत असताना मुक्ताबाई कधी तीन मुक्तांची आई मुक्ताई झाल्या, हे कळलेच नाही, असे गौरवोद्गार त्यांनी काढले.
ते पुढे म्हणाले की, ब्रह्मा, विष्णू व महेश हे त्रिदेव जेव्हा निवृत्ती, ज्ञानदेव व सोपानदेव या संतत्रयांच्या रूपाने अवनीतलावर अवतरण्यास उद्युक्त झाले, तेव्हा आदिशक्ती योगमायेलाही त्यांच्या सोबत अवतरायचे होते. मात्र, मायेचा पडदा त्यांच्या जगदोद्धाराच्या कार्यावर पडू नये म्हणून तिला थांबविण्यात आले. तेव्हा योगमायेने बहीण, मानसकन्या आणि प्रसंगी आई या तिन्ही भूमिका निभावत कोणताही अडथळा न आणता त्यांचे कार्य समर्थपणे पूर्णत्वास नेण्याचे वचन दिले.याच भूमिकांचे सखोल, चिंतनशील आणि सप्रमाण विश्लेषण भागवताचार्य वाघ यांनी ‘ताटी उघडा ज्ञानेश्वरा’ या अभंगाच्या माध्यमातून प्रभावीपणे मांडले. मुक्ताईने एकटीनेच बहीण, प्रेरणादायी शक्ती आणि आई अशा तिन्ही भूमिका अत्यंत समर्थपणे निभावल्याचे दर्शन उपस्थितांना घडले.
या अनोख्या विषयामुळे आणि अभ्यासपूर्ण निरूपणामुळे भाविकांना मकर संक्रांतीच्या पूर्वसंध्येला एक नवीन वैचारिक पर्वणी मिळाली, अशी माहिती वारकरी अवि गावंडे यांनी दिली.