🔸शहीदांना वंदन : त्यागाच्या ज्योतीला अभिवादन करणारा सामूहिक उपवास व समर्पण पुरस्कार सोहळा आयोजित..

Chief EditorMarch 21, 2026

मुख्य संपादक श्री तुळशीराम जांभुळकर

मुर्तीजापुर :-
भारतीय स्वातंत्र्य संग्रामाच्या इतिहासात अमर ठसा उमटवणारे क्रांतीवीर भगतसिंग, राजगुरू आणि सुखदेव यांच्या बलिदान स्मृतीदिनानिमित्त त्याग, समर्पण आणि राष्ट्रनिष्ठेच्या मूल्यांना उजाळा देणारा “शहीदांना वंदन,सामूहिक उपवास कार्यक्रम व समर्पण पुरस्कार वितरण सोहळा” आयोजित करण्यात आला आहे. देशभक्तीच्या प्रेरणादायी भावनेने भारलेला हा कार्यक्रम भूमिपुत्र फाउंडेशन सभागृह, संत वासुदेव महाराज भूमिपुत्र अभियान, सिरसो फाटा, दर्यापूर रोड, मुर्तीजापूर येथे संपन्न होणार असून, हा उपक्रम पाच वर्ष सलगपणे आयोजित होत आहे.
शहीद दिनानिमित्त सोमवार, दि. २३ मार्च रोजी सकाळी १० वाजता गुरुदेव सेवा मंडळ, मुर्तीजापूर तालुका यांच्या वतीने क्रांतीवीरांना अभिवादन करण्यात येणार आहे. देशाच्या स्वातंत्र्यासाठी सर्वस्व अर्पण करणाऱ्या या अमर वीरांच्या स्मृती जागवून नव्या पिढीच्या मनात राष्ट्रप्रेमाची ज्योत प्रज्वलित करण्याचा हा प्रयत्न असल्याचे आयोजकांनी नमूद केले आहे.
या प्रेरणादायी कार्यक्रमास ज्येष्ठ समाजसेवक गजानन हरणे, गुरुदेव सेवा मंडळाचे अध्यक्ष बबनराव देशमुख, समाजहितैषी उत्तमराव पिंजरकर तसेच भूमिपुत्र फाउंडेशनच्या मार्गदर्शक श्रीमती निर्मलाताई सोनखासकर हे प्रमुख अतिथी म्हणून उपस्थित राहणार आहेत. राष्ट्रसंतांच्या विचारांतून राष्ट्रनिष्ठा, सामाजिक बांधिलकी आणि सेवाभावाचा संदेश दिल्या जाणार आहे.
कार्यक्रमाच्या यशस्वी आयोजनासाठी जयदीप सोनखासकर,रामकृष्ण खोपे, गजानन उंबरकर, सौख्य वानखेडे यांच्यासह भूमिपुत्र फाउंडेशन, वासुदेव गोशाळा व राष्ट्रसंत तुकडोजी महाराज भजन मंडळ परिश्रम घेत आहेत. सामाजिक जाणीव जागवणाऱ्या या उपक्रमात सहभागी होऊन शहीदांच्या पवित्र स्मृतीप्रती कृतज्ञता व्यक्त करावी, असे आवाहन आयोजकांकडून करण्यात आले आहे.देशासाठी प्राणार्पण करणाऱ्या शहीदांचे स्मरण म्हणजे केवळ औपचारिकता नसून राष्ट्रप्रेमाच्या संस्कारांचे पुनरुज्जीवन आहे. अशा उपक्रमांमधून समाजात एकात्मता, त्याग आणि कर्तव्यनिष्ठा यांचे बीज रुजते, हेच या कार्यक्रमाचे खरे वैशिष्ट्य ठरणार आहे. तरी या कार्यक्रमाला जास्तीत जास्त संख्येने उपस्थित राहण्याचे आवाहन आयोजकांच्या वतीने करण्यात आले आहे.