▪️कृष्णनगर–भोगणबोडी मार्गावर लॉयड मेटलच्या मुरूम ट्रकांचा धुडगूस..

*🔸 उज्वल देवनाथ*
*🔸 गडचिरोली जिल्हा ब्युरो चीफ*
*🔸 मो नं. 7499963831*

गडचिरोली – ( इंडिया 24 न्युज ) : पहाटेच्या शांत वातावरणात शुद्ध हवा घेण्यासाठी आणि आरोग्यदायी जीवनशैलीसाठी अनेक नागरिक कृष्णा नगर ते भोगणबोडी मार्गावर मॉर्निंग वॉकसाठी जात असतात. मात्र गेल्या काही दिवसांपासून या परिसरातील नागरिकांना शुद्ध हवेसाठी नव्हे तर धुळीच्या लोटांशी सामना करावा लागत असल्याचे चित्र दिसून येत आहे.
स्थानिक नागरिकांच्या म्हणण्यानुसार, lloyds Metal कंपनीशी संबंधित मुरूम वाहतूक करणाऱ्या ट्रकांच्या वाढत्या वर्दळीमुळे संपूर्ण परिसरातील वातावरण दूषित होत आहे. पहाटेच्या वेळेत मोठ्या प्रमाणावर ट्रकांची ये-जा सुरू असल्याने धुळीचे ढग उडत असून नागरिकांना श्वसनाचा त्रास, अस्वस्थता आणि सुरक्षिततेचे प्रश्न निर्माण होत असल्याचा आरोप केला जात आहे. कंपनीचे महाराष्ट्रातील खाण प्रकल्पांशी संबंधित कामकाज असल्याची माहिती उपलब्ध आहे.
स्थानिकांच्या मते, वाहतुकीच्या वाढत्या भारामुळे रस्त्याचीही अवस्था दिवसेंदिवस खालावत चालली आहे. आज ज्या रस्त्यावर नागरिक सकाळी आरोग्यासाठी चालायला जातात, तोच रस्ता भविष्यात खड्ड्यांच्या जाळ्यात अडकण्याची भीती व्यक्त होत आहे.
धूळ नियंत्रणासाठी पाण्याची फवारणी, वाहतुकीचे वेळापत्रक, तसेच रस्त्यांच्या देखभालीबाबत प्रशासनाकडून प्रभावी पावले उचलली जात नसल्याने संताप व्यक्त केला जात आहे. संबंधित विभाग आणि प्रशासनाने याकडे तातडीने लक्ष देऊन उपाययोजना कराव्यात, अशी मागणी स्थानिक नागरिकांकडून केली जात आहे.
“आरोग्यासाठी बाहेर पडणाऱ्या नागरिकांना जर शुद्ध हवेऐवजी धूळच मिळत असेल, तर विकासाच्या नावाखाली नेमकं कोणाचं नुकसान होत आहे?”