🔸गडचिरोलीतील कारगिल चौकात २७ वा कारगिल विजय दिवस देशभक्तीच्या उत्साहात साजरा..

गडचिरोली जिल्हा ब्युरो चीफ : उज्वल देवनाथ

गडचिरोली – ( इंडिया 24 न्युज ) : शहरातील बाजार चौक परिसरातील कारगिल चौक येथे शासकीय पुनर्नियुक्त माजी सैनिक संघटना (जिल्हा गडचिरोली), आजी-माजी सैनिक संघटना आणि कारगिल चौक दुर्गा उत्सव मंडळ यांच्या संयुक्त विद्यमाने २७ वा कारगिल विजय दिवस अत्यंत देशभक्तीपूर्ण वातावरणात उत्साहात साजरा करण्यात आला. १९९९ च्या कारगिल युद्धातील शहीद वीर जवानांच्या अतुलनीय शौर्य व बलिदानाला यावेळी अभिवादन करण्यात आले.

कार्यक्रमाची सुरुवात गांधी चौक ते कारगिल चौक दरम्यान काढण्यात आलेल्या भव्य कारगिल विजय दिन रॅलीने झाली. त्यानंतर कारगिल स्मारकावर पुष्पचक्र अर्पण करून शहीद जवानांना मानवंदना देण्यात आली. एनसीसीच्या विद्यार्थ्यांनी शिस्तबद्ध संचलन व कवायत सादर करून उपस्थितांची मने जिंकली. सहभागी विद्यार्थ्यांना आयोजकांतर्फे नोटबुकांचे वाटप करून गौरविण्यात आले.

*वीरपरिवार व माजी सैनिकांचा सत्कार*

देशासाठी सर्वोच्च बलिदान देणाऱ्या शहीद जवानांच्या वीरमाता, वीरपिता, वीरपत्नी, सैनिकांच्या कुटुंबीयांसह विविध पुरस्कारप्राप्त माजी सैनिकांचा शाल, श्रीफळ व सन्मानचिन्ह देऊन गौरव करण्यात आला. उपस्थितांनी टाळ्यांच्या कडकडाटात त्यांच्या त्यागाबद्दल कृतज्ञता व्यक्त केली.

माजी खासदार डॉ. अशोकजी नेते यांचे प्रेरणादायी मनोगत

कार्यक्रमात प्रमुख उपस्थिती दर्शवत माजी खासदार डॉ. अशोकजी नेते म्हणाले,

“कारगिलच्या उंच पर्वतरांगांमध्ये उणे २० अंश सेल्सिअस तापमानातील प्रतिकुल परिस्थितीत आपल्या जवानांनी अद्वितीय शौर्य गाजवत शत्रूचा पराभव करत कारगिल च्या शिखरांवर भारताचा तिरंगा फडकवत मातृभूमीचे रक्षण केले. त्यांच्या त्यागामुळेच आपण आज सुरक्षित आणि स्वतंत्र भारतात जगत आहोत. सैनिक हे राष्ट्राचे खरे आधारस्तंभ आहेत. निवृत्तीनंतरही माजी सैनिक समाजसेवेच्या माध्यमातून राष्ट्रनिर्मितीत योगदान देत असतात. शहीद जवानांचे बलिदान आणि त्यांच्या कुटुंबीयांचा त्याग हा संपूर्ण देशासाठी सदैव प्रेरणादायी व वंदनीय राहील.” तसेच भारत मातेच्या संरक्षणासाठी वीर जवानांच्या शौर्याला शतशः नमन करतोय.

यावेळी त्यांनी नुकतेच भारत-बांगलादेश सीमेवर कर्तव्य बजावत असताना वीरमरण आलेले गडचिरोली जिल्ह्यातील कुरखेडा तालुक्यातील मरारटोला येथील जवान सुरेश आंबाडर यांना भावपूर्ण श्रद्धांजली अर्पण करून त्यांच्या बलिदानाला शतशः नमन केले.

या कार्यक्रमास माजी खासदार तथा भाजप अनुसूचित जनजाती मोर्चाचे राष्ट्रीय महामंत्री डॉ. अशोकजी नेते यांच्यासह गडचिरोली विधानसभा क्षेत्राचे आमदार डॉ. मिलिंद नरोटे, नगराध्यक्षा अॅड. प्रणोती सागर निंबोरकर, लॉयड्स मेटल्स अँड एनर्जीचे प्रतिनिधी कर्नल रामनाथ स्वामी, माजी नगराध्यक्षा तथा नगरसेविका योगिता पिपरे, कारगिल स्मारक समितीचे संस्थापक उदय धकाते, शासकीय पुनर्नियुक्त माजी सैनिक संघटनेचे जिल्हाध्यक्ष होमराज डोनाळकर, कारगिल समितीचे अध्यक्ष ऋषीजी वंजारी, वीरपत्नी सुधा चंदनखेडे, आरमोरी येथील चंदाताई राऊत,घिसुलाल काबरा,चंद्रशेखर भंडागे तसेच आजी-माजी सैनिक, वीरपरिवार, लोकप्रतिनिधी आणि देशभक्त नागरिक मोठ्या संख्येने उपस्थित होते.

कार्यक्रमाचे प्रास्ताविक व सूत्रसंचालन आयोजक समितीच्या पदाधिकाऱ्यांनी केले. राष्ट्रगीत, महाराष्ट्र गीत आणि “वंदे मातरम्”, “भारत माता की जय” व **”भारतीय सैन्य दल झिंदाबाद”**च्या घोषणांनी कार्यक्रमाची सांगता झाली. संपूर्ण परिसर देशभक्तीच्या वातावरणाने भारावून गेला.