🔹३० बुद्ध विहारांना १४ कृती कार्यक्रमांचे फलक भेट..

राज जांभुळकर : मुख्य कार्यकारी संपादक

अकोला – ( इंडिया 24 न्युज ) : बुद्ध विहार हे केवळ पूजा-अर्चना व प्रार्थनेचे केंद्र न राहता विज्ञानवादी विचार, जिज्ञासा, सामाजिक संस्कार आणि माणूस घडविण्याचे केंद्र बनावे, या व्यापक उद्देशाने बुद्ध विहार समन्वय महासंघ, अकोला यांच्या वतीने शहरातील व परिसरातील ३० बुद्ध विहारांना १४ कृती कार्यक्रमांचे फलक भेट देण्यात आले.
बुद्ध विहारांच्या माध्यमातून समाजामध्ये वैज्ञानिक दृष्टिकोन, सामाजिक बांधिलकी, संविधानिक मूल्ये, समता, बंधुता आणि मानवतावादी विचार रुजविण्याच्या उद्देशाने हे उपक्रम राबविण्यात येत आहेत. विहारांमध्ये महापुरुषांच्या जयंती, संविधान दिन, शौर्य दिन आदी महत्त्वपूर्ण दिवस एकजुटीने साजरे करावेत, तसेच परिसराची स्वच्छता राखण्यासाठी नियमित स्वच्छता मोहीम राबवावी, असा संदेश या फलकांच्या माध्यमातून देण्यात आला.
कार्यक्रमाच्या अध्यक्षस्थानी धम्मविनय सेवा समिती, शिवणीचे अध्यक्ष वसंतरावजी अवचार होते. प्रमुख वक्ते म्हणून धम्मबोधी डोंगरे , तर प्रमुख पाहुणे म्हणून माजी पोलीस उपनिरीक्षक मनोहर वानखडे आणि सामाजिक कार्यकर्ते हरिदास लोणकर उपस्थित होते.कार्यक्रमास अवधूतराव भोजने, बाळूभाऊ शिराळे, अर्चनाताई सोनवणे, रमाबाई दवणे, स्वाती डोंगरे, सुनंदाताई अवचार, संध्या खंडारे, दुर्गाबाई तायडे, नंदाताई अंभोरे, देविदाताई जगताप यांच्यासह विविध बुद्ध विहारांचे महिला संघ व उपासक संघ मोठ्या संख्येने उपस्थित होते. कार्यक्रमाची सुरुवात त्रिशरण, पंचशील ग्रहण करून तसेच महापुरुषांना पुष्पहार अर्पण करून करण्यात आली. उपस्थित मान्यवरांनी बुद्ध विहारांच्या माध्यमातून समाजात विवेकवादी विचार, सामाजिक एकोपा आणि संविधानिक मूल्यांची रुजवणूक करण्याचे आवाहन केले.
विहारांमध्ये नियमितपणे सामाजिक, शैक्षणिक, सांस्कृतिक व प्रबोधनात्मक उपक्रम राबविल्यास समाजातील नव्या पिढीला वैज्ञानिक दृष्टिकोन आणि मानवतावादी संस्कार मिळतील, असा सूर यावेळी व्यक्त करण्यात आला. कार्यक्रमाची सांगता सरनथ्य घेऊन करण्यात आली.