▪️गोंडपिपरी बसस्थानकाचा होणार कायापालट; ५ कोटींच्या निधीला प्रशासकीय मंजुरी!

*🔸सौ. शिल्पा बंनपुरकर*
*🔸संपादक*
*🔸मो नं. 7030292628*

गोंडपिपरी – ( इंडिया 24 न्युज ) : दि. ०७
राजुरा विधानसभा मतदारसंघातील आणि गडचिरोली रामप विभागात येणाऱ्या गोंडपिपरी बसस्थानकाच्या दुरावस्थेचा प्रश्न आता कायमचा मिटणार असून, या बसस्थानकाच्या नूतनीकरणाच्या कामाला प्रशासकीय मंजुरी मिळाली आहे.
राज्य परिवहन मंडळाने या कामासाठी ५ कोटी रुपयांच्या अंदाजपत्रकास मान्यता दिली असून, यामुळे परिसरातील प्रवाशांना आता सुसज्ज सोयी-सुविधा मिळणार आहेत. या कामासाठी राजुरा विधानसभा मतदारसंघाचे आमदार देवराव भोंगळे यांनी शासनाकडे सातत्याने पाठपुरावा केला होता, त्यांच्या या प्रयत्नांना आता मोठे यश आले आहे.

या संदर्भात राज्य परिवहन महामंडळाच्या वतीने अधिकृत पत्र निर्गमित करण्यात आले असून या अंदाजपत्रकास प्रशासकीय मान्यता प्रदान करण्यात आल्याने आता प्रत्यक्ष कामाचा मार्ग मोकळा झाला आहे.

गोंडपिपरी हे तालुक्याचे ठिकाण असल्याने येथे प्रवाशांची मोठी वर्दळ असते. मात्र, सोयीसुविधांच्या अभावामुळे प्रवाशांना अनेक अडचणींचा सामना करावा लागत होता. आता नवीन इमारतीसह प्रवाशांसाठी आसन व्यवस्था, पिण्याचे पाणी आणि स्वच्छतागृहे अशा अद्ययावत सुविधा निर्माण केल्या जाणार आहेत. आमदार देवराव भोंगळे यांनी केलेल्या या पाठपुराव्याबद्दल तालुक्यातील नागरिकांनी समाधान व्यक्त केले असून लवकरच बसस्थानकाच्या कामाला सुरुवात होणार आहे.

▪️गोंडपिपरी बसस्थानकाचे नुतनीकरण ही प्राथमिकता – आमदार देवराव भोंगळे*

गोंडपिपरी हे माझ्या विधानसभा मतदारसंघातील प्रमुख शहर असून तालुक्याचे केंद्र आहे. तसेच हे शहर गडचिरोली जिल्ह्याच्या सिमेलगत असल्याने येथून दररोज शेकडो प्रवाशांची ये-जा असते. मात्र, बसस्थानकाच्या दुरावस्थेमुळे प्रवाशांची गैरसोय होत होती. गोंडपिपरीच्या जनतेला आधुनिक सोयींनी युक्त बसस्थानक मिळावे, ही माझी प्राथमिकता होती. आता ५ कोटींच्या भरीव निधीतून बसस्थानकाचे रूप पालटणार असल्याने विद्यार्थी, नोकरदार आणि सर्वसामान्य प्रवाशांमध्ये आनंदाचे वातावरण आहे. या निधीला प्रशासकीय मंजुरी मिळाल्याने आता प्रत्यक्ष कामाला लवकरच सुरुवात होईल. अशी प्रतिक्रिया आमदार देवराव भोंगळे यांनी व्यक्त केली.