🔸वारकरी शिक्षणसंस्थेतील विद्यार्थ्यांना शैक्षणिक किटचे वाटप..

राज जांभूळकर – मुख्य कार्यकारी संपादक

अकोला – इंडिया 24 न्युज ) : संस्कार, श्रद्धा आणि सेवाभाव यांची त्रिवेणी म्हणजेच वारकरी परंपरा! या दिव्य परंपरेच्या उज्ज्वल संगतीत श्री क्षेत्र श्रद्धासागर, अकोट येथील वारकरी शिक्षणसंस्थेतील विद्यार्थ्यांना शैक्षणिक किटचे वाटप करण्याचा एक प्रेरणादायी उपक्रम नुकताच संपन्न झाला.या उपक्रमाचे औचित्य होते – अकोल्यातील जेष्ठ सामाजिक कार्यकर्ते गुलाबरावजी देशमुख यांच्या ८१ व्या जन्मदिनीचे. त्यांच्या सामाजिक वारशाचे स्मरण करत त्यांच्या सुपुत्र डॉ. कृष्णकांत गुलाबराव वक्टे यांच्या सहकार्याने आणि सेवाभावातून या उपक्रमाला मूर्त स्वरूप देण्यात आले.
हा कार्यक्रम ग्राम राजुरा (ता. अकोट) येथे, संस्थेचे उपाध्यक्ष श्री. महादेवराव ठाकरे यांच्या मातोश्रींच्या पुण्यस्मरणानिमित्त आयोजित करण्यात आलेल्या श्री ग्रंथराज ज्ञानेश्वरी पारायण व अखंड हरिनाम सप्ताहाच्या पावन वातावरणात पार पडला. कार्यक्रमाचे आयोजन श्री संत वासुदेव महाराज ज्ञानपीठ, अकोट संचलित सद्गुरु जोग महाराज शिक्षण संस्था, आळंदी देवाची – उपशाखा श्री क्षेत्र श्रद्धासागर, अकोट यांच्यावतीने करण्यात आले होते.या पावन प्रसंगी श्री संत वासुदेव महाराज ज्ञानपीठ संस्थेचे अध्यक्ष ह.भ.प. वासुदेव महाराज महल्ले, उपाध्यक्ष महादेवराव ठाकरे, ज्येष्ठ समाजसेवक गजानन हरणे, डॉ. कृष्णकांत वक्टे, विजय भटकर आदी मान्यवरांच्या उपस्थितीत विद्यार्थ्यांना शालेय उपयोगी लेटरबुक, पेन व अन्य शैक्षणिक साहित्याचे किट वाटप करण्यात आले.या कार्यक्रमा दरम्यान, संस्थेचे अध्यक्ष ह.भ.प. वासुदेव महाराज महल्ले यांच्या हस्ते डॉ. कृष्णकांत वक्टे, गजानन हरणे , विजय भटकर यांचा शाल व श्रीफळ पुष्पगुच्छ देऊन सन्मानपूर्वक सत्कार करण्यात आला.कार्यक्रमात ह.भ.प. आत्माराम महाराज वाकोडे, ह.भ.प. उमेश महाराज मोहोकार, ह.भ.प. राम महाराज गाढे, ह.भ.प. ऋषिकेश महाराज सोनोने, सुनीलबुवा कोरडे यांच्यासह अनेक मान्यवर उपस्थित होते.
कार्यक्रमाचे सुत्रसंचालन आणि आभार प्रदर्शन ह.भ.प. अंबादास महाराज मानकर यांनी अत्यंत समर्पक शैलीत केले. या पवित्र उपक्रमाचा समारोप महाप्रसाद वितरणाने झाला.या उपक्रमातून विद्यार्थ्यांमध्ये शैक्षणिक प्रोत्साहन तर मिळालेच, पण सेवा, स्मरण व संस्कारांचे देखील अमूल्य बाळकडू मिळाले.