🔸राज्य महोत्सवांतर्गत महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धेचे आयोजन..

मुख्य संपादक श्री. तुळशीराम जांभुळकर

धुळे, दि. 21 ऑगस्ट, 2025 (जिमाका वृत्तसेवा) : महाराष्ट्र शासनाच्या पर्यटन व सांस्कृतिक कार्य विभागामार्फत वर्ष 2025 गणेशोत्सवात उत्कृष्ट सार्वजनिक गणेशोत्सव मंडळांना राज्य शासनाकडून पुरस्कार देण्यात येणार असून या पुस्कारासाठी धुळे जिल्ह्यातील सार्वजनिक गणेश मंडळांनी 25 ऑगस्ट, 2025 पर्यंत अर्ज सादर करावे, असे आवाहन जिल्हा नियोजन अधिकारी सुनिल सोनार यांनी एका प्रसिद्धी पत्रकान्वये केले आहे.

राज्यात सार्वजनिक गणेशोत्सव हा राज्य महोत्सव म्हणून साजरा करण्याचा निर्णय शासनाने घेतला आहे. त्या अनुषंगाने विविध स्पर्धा, उपक्रम, सांस्कृतिक कार्यक्रमाचे आयेाजन करण्यात येणार असून उत्कृष्ट सार्वजनिक गणेशोत्सव मंडळांना तालुका, जिल्हा व राज्यस्तरावर पुरस्कृत करण्यात येणार आहे.

तालुकास्तरावरील प्रथम क्रमांकाच्या विजेत्या मंडळास 25 हजार, जिल्हास्तरावर प्रथम क्रमांक विजेत्यास 50 हजार, द्वितीय 40 हजार तर तृतीय क्रमांकास 30 हजार रक्कम मिळेल. तर राज्यस्तरावर पहिल्या तीन विजेत्यास प्रथम 7 लाख 50 हजार, द्वितीय 5 लाख तर तृतीय 2 लाख 50 हजाराचे पारितोषिक देण्यात येईल.

स्पर्धेत केवळ नोंदणीकृत संस्था अथवा परवानाधारक मंडळांना सहभागी होता येईल. तसेच गणेशोत्सव स्पर्धेअंतर्गत भाग घेणाऱ्या मंडळापैकी मागील सलग 2 वर्षे राज्यस्तरीय, जिल्हास्तरीय पारितोषिक प्राप्त झालेली सार्वजनिक गणेशोत्सव मंडळे पारितोषिकास पात्र ठरणार नाही. स्पर्धेत सहभागी होणाऱ्या सार्वजनिक गणेशोत्सव मंडळांची पुरस्कारासाठी निवड पुढील निकषाच्या आधारे करण्यात येईल. यात कलांचे जतन व संवर्धन, संस्कृतीचे जतन व सवंर्धन, निसर्गाचे व सार्वजनिक संपत्तीचे जतन व संवर्धन, सामाजिक कार्य, गणेशोत्सव आयोजनातील विधायकता या आधारे पुरस्कारासाठी निवड करण्यात येईल.

स्पर्धेत भाग घेण्यासाठी सार्वजनिक गणेशोत्सव मंडळांनी पु. ल. देशपांडे महाराष्ट्र कला अकादमी, मुंबईच्या https://www.pldeshpandekalaacademy.org/ या संकेतस्थळावर उपलब्ध करून देण्यात आलेल्या ganeshotsav.pldmka.co.in या पोर्टलद्वारे ऑनलाइन स्वरूपात स्वीकारले जाणार आहेत. स्पर्धेचे अर्ज स्वीकारण्याची अंतिम तारीख २५ ऑगस्ट २०२५ आहे. नोंदणीकृत व परवानाधारक सार्वजनिक गणेशोत्सव मंडळ या स्पर्धेत सहभागी व्हावे, असे आवाहन जिल्हा नियोजन अधिकारी सुनिल सोनार यांनी केले आहे.