🔸चंद्रपूरच्या खाजगी कोचिंग क्लासेस मधील वस्तीगृहातील आत्महत्यांवर NSUI चा रोष..

मुख्य संपादक श्री. तुळशीराम जांभुळकर

चंद्रपूर – ( इंडिया 24 न्युज ) : शहरातील खाजगी कोचिंग क्लासेस आणि संलग्न वस्तीगृहांमध्ये अल्पावधीत वाढलेल्या विद्यार्थ्यांच्या आत्महत्यांच्या भीषण घटनांवर राष्ट्रीय विद्यार्थी संघटना (NSUI) चंद्रपूरने तीव्र नाराजी व्यक्त केली असून, जिल्हा प्रशासनाकडून तातडीने कठोर कारवाईची मागणी केली आहे. या प्रकरणात संबंधित संस्थांवर सदोष मनुष्यवधाचे गुन्हे दाखल करण्याची मागणी NSUI ने आज जिल्हाधिकाऱ्यांना सादर केलेल्या निवेदनातून केली.
बायोमेडिकल कचरा कचरा खुल्या जागेत जाळला
NSUI चे जिल्हाध्यक्ष शफक शेख यांच्या नेतृत्वात आज जिल्हाधिकारी कार्यालयात प्रतिनिधी मंडळाने भेट देत वाढत्या घटनांमागील कोचिंग संस्थांची बेफिकीरी, अवाजवी शैक्षणिक दडपण, अवैध फी वसुली आणि वस्तीगृहांमधील सुरक्षा व्यवस्थेचा संपूर्ण अभाव यावर तीक्ष्ण आक्षेप नोंदविला. यावेळी युवक काँग्रेसचे प्रदेश सचिव याकूब पठान, तसेच आतिश दुपारे, इमरान शेख, रोहित, नावेद आणि NSUI चे कार्यकर्ते उपस्थित होते.
निवेदनात NSUI ने नमूद केले की वस्तीगृहांमध्ये CCTV नसणे, वार्डन किंवा सुरक्षा रक्षकांची अनुपस्थिती, विद्यार्थ्यांच्या मानसिक आरोग्यासाठी कोणत्याही प्रकारचे समुपदेशन उपलब्ध नसणे, तसेच अवाजवी अभ्यास ताणामुळे अनेक विद्यार्थी तीव्र मानसिक तणावाखाली जात असल्याची धक्कादायक माहिती समोर आली आहे. संस्थांची ही सर्रास बेपर्वाई विद्यार्थ्यांच्या जीवनाशी थेट खेळ करणारी असून, प्रशासनाने अशा संस्थांचा तातडीने बंदोबस्त करावा, अशी भूमिकाही NSUI ने मांडली.
जिल्ह्यातील सर्व कोचिंग संस्था व वस्तीगृहांची कार्यप्रणाली, शुल्क व्यवहार आणि सुरक्षा पायाभूत सुविधांची SIT मार्फत सखोल चौकशी केली जावी., ज्या प्रकरणांमध्ये संस्थांची हलगर्जी, मानसिक छळ किंवा सुरक्षा अभावामुळे आत्महत्या घडल्या आहेत, त्या व्यवस्थापनावर सदोष मनुष्यवधाचे गुन्हे दाखल करावेत आणि सर्व वस्तीगृहांमध्ये 24×7 सुरक्षा रक्षक, आधुनिक CCTV आणि शासकीय मानसिक समुपदेशकांची नियमित नियुक्ती करणे बंधनकारक करण्यात यावे. जिल्हाध्यक्ष शफक शेख यांनी इशारा दिला की, “प्रशासनाने हा संवेदनशील विषय गांभीर्याने न घेतल्यास आणि मागण्या मान्य न केल्यास NSUI चंद्रपूरकडून तीव्र आंदोलन छेडण्यात येईल.”