आपला जिल्हा ताज्या घडामोडी महाराष्ट्र राजकीय

🔸प्रेस क्लब मूलतर्फे नवनिर्वाचित नगराध्यक्षा व नगरसेवकांचा सत्कार सोहळा संपन्न..

Chief EditorDecember 30, 2025

डॉ. आनंदराव कुळे
मूल तालुका प्रतिनिधी
मो. क्र. ९४०३१७९७२७

मूल – ( इंडिया २४ न्यूज ) : प्रेस क्लब मूलच्या वतीने मूल नगर परिषदेत नुकतेच निर्वाचित झालेल्या नगराध्यक्षा व सर्व नगरसेवकांचा शाल, श्रीफळ व स्मृतीचिन्ह देऊन सत्कार करण्यात आला.

या सत्कार समारंभाच्या अध्यक्षस्थानी प्रेस क्लबचे अध्यक्ष नासिर खान होते. व्यासपीठावर नगराध्यक्षा एकता समर्थ, ज्येष्ठ पत्रकार विजय सिद्धावार, नगरसेवक प्रशांत समर्थ तसेच सामाजिक कार्यकर्ते भगवान ढोरे उपस्थित होते.

प्रेस क्लबचे अध्यक्ष व पदाधिकाऱ्यांच्या हस्ते नगराध्यक्षा व नगरसेवकांचे औपचारिक स्वागत करून त्यांना शाल, श्रीफळ व स्मृतीचिन्ह प्रदान करण्यात आले.

यावेळी अध्यक्ष नासिर खान, ज्येष्ठ पत्रकार विजय सिद्धावार, नगरसेवक प्रशांत समर्थ, नगराध्यक्षा एकता समर्थ, नगरसेवक अशोक येरमे, विलास कागदेलवार, नगरसेविका लिना फुलझेले व नलिनी आडपवार यांनी मनोगत व्यक्त करत शहराच्या सर्वांगीण विकासासाठी सामूहिक प्रयत्न करण्याचा निर्धार व्यक्त केला.

याच कार्यक्रमात पत्रकार भोजराज गोवर्धन यांची जिल्हा सहकारी बोर्डावर संचालक म्हणून अविरोध निवड झाल्याबद्दल त्यांचाही शाल, श्रीफळ व स्मृतीचिन्ह देऊन विशेष सत्कार करण्यात आला.

कार्यक्रमाची सुरुवात मूल शहराचे पहिले नगराध्यक्ष धनजीभाई शहा यांच्या प्रतिमेला अभिवादन करून करण्यात आली. यावेळी प्रेस क्लबच्या मागणीनुसार गांधी चौक ते विश्रामगृह या रस्त्याला धनजीभाई शहा यांचे नाव देण्याची घोषणा करण्यात आली. तसेच त्यांच्या नावाने मूल शहरात नवे सभागृह उभारण्याचे आश्वासनही यावेळी देण्यात आले.

कार्यक्रमाचे सूत्रसंचालन प्रेस क्लबचे सदस्य डॉ. आनंदराव कुळे यांनी केले, तर आभार प्रदर्शन नितेश मॅकलवार यांनी केले. कार्यक्रमास सर्व नगरसेवक मोठ्या संख्येने उपस्थित होते. नगरसेवक राकेश रत्नावार यांच्या शुभेच्छांचाही यावेळी वाचनाद्वारे समावेश करण्यात आला.