🔸राष्ट्रीय अ‍ॅबॅकस स्पर्धेत गोंडपिपरीचा ‘सिद्धांत’ देशात अव्वल..

*🔸श्री. उज्वल देवनाथ*
*🔸 गडचिरोली जिल्हा ब्युरो चीफ*
*🔸 मो नं. 7499963831*

गोंडपिपरी – ( इंडिया 24 न्युज ) : तालुक्याच्या शैक्षणिक क्षेत्रासाठी अभिमानाची बाब ठरावी अशी कामगिरी स्थानिक सांजो कॉन्व्हेंट स्कूलच्या सहा वर्षीय विद्यार्थी सिद्धांत गौतम वाणी याने केली आहे. पुणे येथे पार पडलेल्या राष्ट्रीय अ‍ॅबॅकस स्पर्धा २०२६ मध्ये सिद्धांतने देशभरातील प्रतिभावान विद्यार्थ्यांमध्ये चमकदार कामगिरी करत सर्वोत्कृष्ट कामगिरीचा पुरस्कार पटकावला. अल्पवयातच त्याने दाखवलेली गणितीय अचूकता आणि मानसिक गणना कौशल्ये सर्वांना थक्क करणारी ठरली.
स्पर्धा अत्यंत कठीण स्वरूपाची असतानाही सिद्धांतने अवघ्या ६ मिनिटांत १०० पैकी तब्बल ९५ प्रश्न अचूक सोडवत आपली असामान्य बुद्धिमत्ता सिद्ध केली. मुंबईस्थित भारतातील प्रतिष्ठित ‘प्रो अ‍ॅक्टिव्ह अ‍ॅबॅकस’ संस्थेच्या वतीने आयोजित या राष्ट्रीय स्तरावरील स्पर्धेत देशातील विविध राज्यांतील विद्यार्थ्यांनी सहभाग घेतला होता. सिद्धांतच्या यशामुळे गोंडपिपरी तालुक्याचे नाव राष्ट्रीय पातळीवर झळकले आहे.
या यशामागे ब्रेन पॉवर प्रो अ‍ॅक्टिव्ह अ‍ॅबॅकस, चंद्रपूरचे संचालक श्री. धीरज बक्षी व सौ. निर्जरा बक्षी यांचे मार्गदर्शन लाभले. तसेच गोंडपिपरी येथील कोचिंग सेंटरच्या शिक्षिका श्रीमती पूजा तेलकापल्लीवार, सांजो कॉन्व्हेंट स्कूलच्या प्राचार्या सिस्टर ग्रिटी, वर्गशिक्षिका आरती मॅडम, कुटुंबीय आणि हितचिंतकांनी सिद्धांतच्या यशाचे कौतुक करत त्याच्या उज्ज्वल भविष्यासाठी शुभेच्छांचा वर्षाव केला. सिद्धांतची ही कामगिरी गोंडपिपरीसह संपूर्ण जिल्ह्यासाठी प्रेरणादायी ठरत आहे.