आपला जिल्हा ताज्या घडामोडी देश विदेश महाराष्ट्र

🔸मूल येथील गुजरी चौकात विशाल हिंदू संमेलन संपन्न..

🔸सकल हिंदूंनी जातीभेद विसरून एकत्र येणे गरजेचे - संत मुरलीधर महाराज

Chief EditorMarch 9, 2026

डॉ. आनंदराव कुळे
मूल तालुका प्रतिनिधी
मो. क्र. ९४०३१७९७२७

मूल – (इंडिया २४ न्यूज ): हिंदू समाजातील एकता दृढ करण्यासाठी व संस्कृतीचे जतन करण्याच्या उद्देशाने मूल येथील गुजरी चौकात शिवाजी महाराज वस्ती मूल च्या वतीने विशाल हिंदू संमेलनाचे आयोजन दि. ०७ मार्च २०२६ ला मोठया उत्साहात व भक्तिमय वातावरणात करण्यात आले.संमेलनास परिसरातील नागरिकांची, महिला मंडळींची व आबाल वृद्धांची मोठ्या संख्येनी उपस्थिती होती.
संमेलनात मार्गदर्शक म्हणून श्री संत मुरलीधर स्वामी यांनी देश आणि धर्म टिकवून ठेवण्यासाठी हिंदू समाज बांधवांनी समाजातील वर्णभेद, जातीभेद आणि भेदभाव दूर करणे आवश्यक आहे. समाजात सामाजिक समरसता निर्माण करणे गरजेचे असून परिवर्तनाची सुरुवात प्रत्येकाने स्वतःपासून करावी. भारतात असणारा प्रत्येक नागरिक हिंदू आहे. प्रत्येकाने हिंदुत्व स्वीकारून त्याप्रमाणे आचरण करणे आणि वागणे आवश्यक आहे. हिंदू धर्म संकटात असून प्रत्येकाने जागरूक राहणे गरजेचे आहे. धर्मांतर करणे हे दुर्दैव असून धर्मांतर करण्यामागची कारणे आणि त्यावरील उपाय शोधणे अति आवश्यक असून धर्मांतर रोखणे गरजेचे असल्याचेही त्यांनी सांगितले.
संमेलनात प्रमुख वक्ते श्री क्रिष्णाजी ठाकरे प्रांत प्रमुख रा. स्व. संघ यांनी आपल्या मार्गदर्शनात सांगितले की, जेव्हा जेव्हा हिंदू धर्मावर संकट येते तेव्हा तेंव्हा धर्मरक्षणासाठी विविध रूपात कार्य होत असते. राष्ट्रीय स्वयंसेवक संघ समाजात संघटन, संस्कार आणि धर्मरक्षणाचे कार्य करीत असते. त्यांनी* पंचापरिवर्तन *विषयी सविस्तर माहिती दिली. “स्व “ची जाणीव करून देऊन हिंदू धर्माचे तत्व स्वीकारून त्याची सुरुवात स्वतःपासूनच करणे गरजेचे असल्याचेही त्यांनी सांगितले.सोबतच हिंदू समाजातील प्रत्येकांनी संघटित राहून हिंदू समाज हितकार्यासाठी वाहून घेण्याचे आवाहन केले.
संमेलनाची सुरुवात मूल शहरात कलश यात्रा व दिंडीने करण्यात आली.कलश यात्रेत वेगवेगळया पारंपारिक वेशभूषेत महिला, पुरुष , आबाल वृद्ध व मुले, मुली यांनी दिलेल्या संतांच्या जय घोषामुळे संपूर्ण शहरात उत्साहाचे व भक्तिमय वातावरण निर्माण झाले.या कलशयात्रा व दिंडीत चिमुकल्यांनी भारतमाता, जिजाऊ माँ , शिवाजी महाराज,राम, लक्ष्मण, सीतामाई, कृष्णा, राधा, देवी देवता यांची वेशभूषा केल्याने सर्वांचे लक्ष केंद्रित केले.त्यानंतर संमेलन स्थळी धर्म ध्वजारोहण, गोमाता पूजन करण्यात आले.समाजात संस्कृतीचे जतन आणि सामाजिक बांधिलकी याचा संदेश देण्यात आला.महाप्रसादाने संमेलनाची सांगता करण्यात आली.
कार्यक्रमाचे प्रास्ताविक आयोजन समिती प्रमुख श्री. अशोकजी मैदमवार यांनी केले. संचलन श्री. बल्लावार सर यांनी तर आभार प्रदर्शन सुखदेव मांदाडे यांनी केले.
संमेलनाचे नियोजन आयोजन समितीचे प्रमुख अशोकजी मैदमवार आणि सहप्रमुख नागोसे मॅडम यांचे मार्गदर्शनात उत्कृष्ठ रित्या करण्यात आले.