आपला जिल्हा ताज्या घडामोडी देश विदेश महाराष्ट्र

🔹अनुसूचित जातींच्या आरक्षण उपवर्गीकरणाविरोधात नागभिडमध्ये एल्गार; संविधानिक हक्कांच्या संरक्षणासाठी संघर्ष समितीची बांधणी..

🔹सामाजिक न्यायावर घाला घालणाऱ्या निर्णयांविरोधात संघटित लढ्याची घोषणा; नागपूर महा मोर्चासाठी हजारोंच्या सहभागाचे आवाहन..

Chief EditorJune 14, 2026

मुख्य संपादक श्री. तुळशीराम जांभुळकर

नागभिड – ( इंडिया 24 न्युज ) : महाराष्ट्रातील अनुसूचित जातींच्या आरक्षणाच्या उपवर्गीकरणाच्या विषयावर नागभिड येथे संवाद सभा ही उत्साहात व शिस्तबद्ध वातावरणात पार पडली. सभेमध्ये संविधानाने अनुसूचित जातींना प्रदान केलेल्या अधिकारांचे संरक्षण, सामाजिक न्यायाची अंमलबजावणी आणि संबंधित कायदेशीर घडामोडींविषयी जनजागृती करण्यावर भर देण्यात आला.

यावेळी महाराष्ट्रातील अनुसूचित जातींच्या संयुक्त केंद्रीय संघर्ष कृती समितीच्या नागभिड तालुका कार्यकारिणीची निवड करण्यात आली. तालुका कृती समितीच्या अध्यक्षपदी आनंद मेश्राम, उपाध्यक्षपदी प्रशांत गेडाम, संयोजक तथा सचिवपदी सागर शंभरकर, मुख्य संघटकपदी करुणा सोनटक्के, सहसंयोजकपदी चंदन कोसे यांची निवड करण्यात आली. तसेच विनय शेंडे, मंगेश फुलझेले आणि धर्मवीर गिरटकर यांची सदस्य म्हणून निवड करण्यात आली.

यावेळी प्रीतम बुलकुंडे (आवाज इंडिया, नागपूर) आणि अॅड. स्मिता कांबळे (उच्च न्यायालय, नागपूर) यांनी मार्गदर्शन केले. त्यांनी उपवर्गीकरणासंदर्भातील घटनात्मक तरतुदी, न्यायालयीन प्रक्रिया, सामाजिक परिणाम आणि कायदेशीर बाबींवर सविस्तर विवेचन केले. संविधानिक मूल्ये, समान संधी आणि सामाजिक न्याय यांचे रक्षण करण्यासाठी लोकशाही मार्गाने संघटित प्रयत्नांची आवश्यकता असल्याचे त्यांनी नमूद केले.

सभेला श्याम रामटेके,कल्पना खरात, कल्पना सोनटक्के, मंगेश फुलझेले, अमित मेश्राम, प्रशांत गेडाम, मंगल कोसे, गोसावी वालदे, मनोहर रामटेके, बंडू खोब्रागडे, विनय शेंडे, प्रकाश गणेर, वतन हुमणे, आनंद मेश्राम, चंदन कोसे, विकी मेश्राम, डी. बी. खोब्रागडे, घुटके साहेब, निकेश रामटेके यांच्यासह विविध सामाजिक संघटनांचे पदाधिकारी, कर्मचारी, युवक, विद्यार्थी, महिला, निवृत्त नागरिक आणि समाजबांधव मोठ्या संख्येने उपस्थित होते.

सभेत उपस्थितांनी सामाजिक न्याय, बंधुता आणि संविधानिक अधिकारांच्या संरक्षणासाठी जनजागृती अभियान राबविण्याचा निर्धार व्यक्त केला. तसेच नागपूर येथे आयोजित करण्यात येणाऱ्या महा मोर्चात व्यापक सहभाग नोंदविण्याचे आवाहन करण्यात आले.

यावेळी आयोजकांच्या वतीने आवाहन करण्यात आले की, अनुसूचित जातीतील सर्व ५९ जातींचे युवक, विद्यार्थी, महिला, कर्मचारी, निवृत्त नागरिक व समाजबांधवांनी मोठ्या संख्येने उपस्थित राहून सामाजिक न्याय, संविधानिक हक्क आणि लोकशाही मूल्यांच्या संरक्षणासाठी सुरू असलेल्या या लढ्याला बळ द्यावे.

सभेचा समारोप “जय भीम, जय संविधान”च्या घोषणांनी करण्यात आला. सभेचे संचालन करूणा सोनटक्के यांनी केले तर आभार प्र दर्शन संयोजक सागर शंभरकर यांनी केले.