🔸महाकाली कॉलरी, कँटीन चौक येथे श्री शीतला, श्री चंडिका व श्री रेणुका माता मूर्ती स्थापना सोहळा…

मुख्य संपादक श्री. तुळशीराम जांभुळकर

चंद्रपूर – ( इंडिया 24 न्युज ) : : महाकाली कॉलरी, कँटीन चौक येथे श्री शीतला माता, श्री चंडिका माता व श्री रेणुका माता यांच्या मूर्ती स्थापना सोहळ्याचे आयोजन 19 व 20 जुलै 2026 रोजी मोठ्या उत्साहात व भक्तिभावाने पार पडले. दोन दिवस चाललेल्या या धार्मिक सोहळ्यात शेकडो माता भक्तांनी उत्स्फूर्त सहभाग घेतला.

रविवार, 19 जुलै रोजी दुपारी 12 वाजता मूर्तींचे भव्य आगमन झाल्यानंतर पारंपरिक वाद्यांच्या गजरात आणि जयघोषात कलश यात्रा काढण्यात आली. महिला, युवक, ज्येष्ठ नागरिक तसेच परिसरातील नागरिक मोठ्या संख्येने या यात्रेत सहभागी झाले. संपूर्ण परिसर विद्युत रोषणाई, फुलांची आकर्षक सजावट आणि धार्मिक देखाव्यांनी उजळून निघाला होता.

सोमवार, 20 जुलै रोजी सकाळी 4 वाजता वैदिक मंत्रोच्चारात श्री शीतला माता, श्री चंडिका माता व श्री रेणुका माता यांच्या मूर्तींची विधिवत स्थापना करण्यात आली. त्यानंतर विद्वान पुरोहितांच्या उपस्थितीत हवन-पूजन संपन्न झाले. सायंकाळी आयोजित महाप्रसादाचा हजारो भाविकांनी लाभ घेतला.

या सोहळ्याच्या माध्यमातून समाजात श्रद्धा, ऐक्य, बंधुभाव आणि भारतीय संस्कृतीचे जतन करण्याचा संदेश देण्यात आला. कार्यक्रमाच्या यशस्वी आयोजनासाठी महाकाली कॉलरी, कँटीन चौक येथील समस्त माता भक्त मंडळाचे पदाधिकारी, कार्यकर्ते आणि नागरिकांनी अथक परिश्रम घेतले.

कार्यक्रमादरम्यान चंद्रपूर शहर व परिसरातील विविध भागांतून आलेल्या भाविकांनी देवीचे दर्शन घेत धार्मिक कार्यक्रमात सहभाग नोंदविला. संपूर्ण परिसर दोन दिवस भक्तिमय वातावरणाने दुमदुमून गेला.