🔹धम्मदूत महिलांची धम्म संदेश पदयात्रा उत्साहात; बुद्धविचारांचा जागर!!

राज जांभुळकर : मुख्य कार्यकारी संपादक

अकोला : ( इंडिया 24 न्युज ) – बुद्ध विहार समन्वय महासंघ अकोल्याच्या वतीने धम्म संदेश पदयात्रा चे आयोजन करण्यात आले होते त्यामध्ये सर्वप्रथम तथागत भगवान गौतम बुद्धांनी जगाला दिलेला करुणा, समता, बंधुता आणि प्रज्ञेचा धम्म समाजजीवनात रुजविण्याच्या उद्देशाने अकोल्यातील लेबर कॉलनी-कृषीनगर परिसरात धम्मदूत महिलांची धम्म संदेश पदयात्रा उत्साहपूर्ण व धम्ममय वातावरणात पार पडली. महिलांनी हातात धम्मध्वज घेऊन दिलेल्या संदेशातून बुद्धविचारांचा जागर करण्यात आला.
कार्यक्रमाच्या प्रारंभी तथागत भगवान बुद्ध, महात्मा ज्योतिबा फुले आणि भारतरत्न डॉ. बाबासाहेब आंबेडकर यांच्या प्रतिमांना प्रमुख पाहुण्यांच्या हस्ते हार व पुष्प अर्पण करून त्रिवार वंदन करण्यात आले. भारतीय बौद्ध महासभा अकोला जिल्ह्याचे अध्यक्ष माननीय वानखडे, बुद्ध विहार समिती लेबर कॉलनी-कृषीनगरचे अध्यक्ष देवरावजी अहिर , समाजसेवक तथा प्रा. डॉ. दिवाकर सदाशिव समाजसेविका सुमन तिरपुडे आणि धम्मबोधी डोंगरे यांच्या हस्ते धम्म संदेश पदयात्रेचे उद्घाटन करण्यात आले. मान्यवरांच्या हस्ते हिरवी झेंडा दाखवून पदयात्रेला प्रारंभ करण्यात आला.
पदयात्रेत महिलांसह बौद्ध बांधव मोठ्या संख्येने सहभागी झाले होते. बुद्धविचार, धम्माचे आचरण, सामाजिक समता आणि मानवतेचा संदेश देत ही पदयात्रा बुद्ध विहार समिती लेबर कॉलनी-कृषीनगर येथे पोहोचली. तेथे आर्याजी यांच्या मार्गदर्शनाखाली त्रिशरण व पंचशील ग्रहणाचा कार्यक्रम पार पडला. उपस्थित बौद्ध बांधवांनी श्रद्धेने त्रिशरण-पंचशील ग्रहण करून भगवान बुद्धांच्या धम्ममार्गावर चालण्याचा संकल्प केला.
कार्यक्रमाला उपस्थित मान्यवरांचे महाराष्ट्रातील प्रसिद्ध गायिका भाग्यश्री इंगळे तसेच मोठी उमरी, अकोला येथील पातोळेताई यांनी सुरेल स्वागतगीत सादर करून भावपूर्ण स्वागत केले. त्यांच्या गीतांनी कार्यक्रमस्थळी धम्ममय वातावरण निर्माण झाले.
कार्यक्रमाचे प्रास्ताविक वसंतरावजी अवचार, अध्यक्ष, धम्मविनय सेवा समिती, शिवनी यांनी केले. प्रमुख वक्ते धम्मबोधी डोंगरे यांनी आपल्या मार्गदर्शनातून भगवान बुद्धांचा धम्म हा केवळ पूजा-अर्चेपुरता मर्यादित नसून तो विवेक, करुणा, समता, मैत्री आणि मानवकल्याणाचा जीवनमार्ग असल्याचे प्रतिपादन केले. बुद्ध, फुले आणि डॉ. बाबासाहेब आंबेडकर यांच्या विचारांचा वारसा पुढे नेण्यासाठी समाजाने शिक्षण, संघटन आणि प्रबोधनाला प्राधान्य द्यावे, असे आवाहन त्यांनी केले.
कार्यक्रमाच्या अध्यक्षांनी आपल्या मनोगतात धम्म संदेश पदयात्रेसारख्या उपक्रमांमधून महिलांची सामाजिक व वैचारिक भूमिका अधिक बळकट होत असल्याचे सांगितले. समाजातील अंधश्रद्धा, विषमता आणि सामाजिक भेदभाव दूर करण्यासाठी बुद्धविचारांची ज्योत प्रत्येक घरापर्यंत पोहोचविण्याची गरज त्यांनी व्यक्त केली.
या कार्यक्रमाच्या यशस्वितेसाठी अष्टशिला महिला संघ, लेबर कॉलनी-कृषीनगर, अकोला, भीम युवक व्यायाम शाळा, तसेच भारतीय बौद्ध महासभेचे पूर्वाध्यक्ष गौरवनाथजी वानखडे, संघटक मधुकररावजी लबडे, अॅड. अजय गवई, अॅड. बुद्धभूषण गोपनारायण यांनी विशेष सहकार्य केले. कार्यक्रमासाठी धम्मदानाच्या माध्यमातून दानदाते अॅड. आम्रपाली गोपनारायण तसेच कंसात भावे यांनी सहकार्य केले.
कार्यक्रमाचे आभार प्रदर्शन प्रा. नानाभाऊ किरतकार सर यांनी केले.
महिलांच्या सहभागातून झालेली ही धम्म संदेश पदयात्रा म्हणजे केवळ एका दिवसाचा उपक्रम नव्हता, तर बुद्धांच्या करुणेची, फुल्यांच्या समतेची आणि डॉ. बाबासाहेब आंबेडकरांच्या सामाजिक न्यायाची मशाल पुढे नेणारा वैचारिक जागर ठरला. धम्माचा प्रकाश समाजातील प्रत्येक घटकापर्यंत पोहोचविण्याचा निर्धार या पदयात्रेतून व्यक्त झाला. कार्यक्रमाचे सूत्रसंचालन माजी पोलीस उपनिरीक्षक मनोहर वानखडे तर पदयात्रेचे संचालन प्रा. डॉ. दिवाकर सदाशिव यांनी केले. कार्यक्रमाला मोठ्या प्रमाणात महिला पुरुष युवक उपस्थित होते.