🔸समाजाच्या जडणघडणीत महिलांचे मोलाचे योगदान – सौ.अर्चना भोंगळे

*🔸सौ. शिल्पा बंनपुरकर*
*🔸संपादक*
*🔸मो नं. 7030292628*

राजुरा – ( इंडिया 24 न्युज ) : प्रत्येक क्षेत्रात आज महिला जिद्दीने पुढे येऊन काम करीत आहे. तिच्या जिद्दीमुळे आणि कष्टांमुळे आज समाजाचे चित्र बदलताना दिसत आहे.प्रशासकीय कामापासून ते शेतीच्या बांधापर्यंत तिचे नेतृत्व सिद्ध आहे. महिला ही प्रेम, जिव्हाळ्याचे प्रतीक असून समाजाच्या जडणघडणीत महिलांचे मोलाचे योगदान असल्याचे प्रतिपादन सौ.अर्चना देवराव भोंगळे यांनी केले.

राजुरा येथील भवानी मंदिरात काल (दि.१२) जागतिक महिला दिनाचे औचित्य साधून पतंजली योग समिती,भारत स्वाभिमान ट्रस्ट व किसान सेवा समितीच्या वतीने विविध कार्यक्रम व सत्कार समारंभाचे आयोजन करण्यात आले. यावेळी सौ.अर्चना भोंगळे बोलत होत्या.

पुढे बोलतांना सौ अर्चना भोंगळे म्हणाल्या की, स्त्री म्हणजे केवळ त्याग आणि समर्पण नाही, तर ती एक स्वतंत्र शक्ती आहे. शिक्षण आणि स्वावलंबनाच्या जोरावर तिने स्वतःचे अस्तित्व निर्माण केले आहे. आपण सर्वांनी स्त्री शक्तीचा आदर केला पाहिजे. गावाच्या विकासापासून ते कुटुंबाच्या समृद्धीपर्यंत महिलांचा मोठा वाटा आहे. “जिच्या हाती पाळण्याची दोरी, ती जगाला उद्धारी” ही म्हण सार्थ ठरवीत जगाचा उद्धार करण्याची ताकद महिलांमध्ये आहे. सामाजिक नेतृत्वात महिलांचा वाढता सहभाग हा उज्ज्वल भविष्याचा संकेत असल्याचे मत सौ.भोंगळे यांनी व्यक्त केले. यावेळी विविध क्षेत्रात उत्कृष्ट कार्य करणाऱ्या महिलांचा मान्यवरांच्या हस्ते सत्कार करण्यात आला.

याप्रसंगी माजी जि. प. सदस्या तेजस्विनी कावळे, लाठी येथील पोलिस निरीक्षक निशा भुते, सुनिता जमदाडे, उराडे मॅडम, हरिभाऊ डोर्लीकर, मुखरुजी सेलोटे, पुंडलिक उराडे, सतीश शिंदे तसेच राजुरा येथील पतंजली योग समितीचे पदाधिकारी, कार्यकर्ते यांचेसह भाजपा पदाधिकारी ,कार्यकर्ते व नागरिक मोठ्या संख्येने उपस्थित होते.