🔸गडचिरोलीत राज्यमंत्री डॉ. पंकजजी भोयर यांच्या मार्गदर्शनात भव्य कार्यकर्ता संवाद; संघटन बळकटीसाठी कार्यकर्त्यांना एकजुटीने काम करण्याचे आवाहन..

गडचिरोली जिल्हा ब्युरो चीफ : उज्वल देवनाथ

गडचिरोली – ( इंडिया 24 न्युज ) : दि. १६ ऑगस्ट २०२६ भारतीय जनता पार्टी, गडचिरोलीच्या वतीने आमदार डॉ. मिलिंदजी नरोटे यांच्या कर्तव्य कक्ष जनसंपर्क कार्यालय, गडचिरोली येथे भव्य कार्यकर्ता संवाद कार्यक्रम उत्साहपूर्ण वातावरणात संपन्न झाला. महाराष्ट्राचे गृह (ग्रामीण) गृहनिर्माण, शालेय शिक्षण, सहकार व खनिकर्म राज्यमंत्री तथा वर्धा व भंडारा जिल्ह्याचे पालकमंत्री मा. ना. डॉ. पंकजजी भोयर यांनी यावेळी भाजपा पदाधिकारी व कार्यकर्त्यांशी मनमोकळा संवाद साधत मार्गदर्शन केले. कार्यक्रमाला भाजपाचे माजी खासदार तथा राष्ट्रीय महामंत्री भाजपा अनुसुचित जनजाती मोर्चा डॉ. अशोकजी नेते यांची विशेष उपस्थिती लाभली.

यावेळी आमदार डॉ. मिलिंदजी नरोटे, जिल्हाध्यक्ष रमेशजी बारसागडे, माजी आमदार डॉ. देवरावजी होळी, माजी आमदार कृष्णाजी गजबे, नगराध्यक्ष ॲड. प्रणोती निंबोरकर, ज्येष्ठ नेते बाबूराव कोहळे, महिला मोर्चा प्रदेश सचिव रेखाताई डोळस, जिल्हा महामंत्री सदानंद कुथे, प्रकाश गेडाम, ज्येष्ठ नेते प्रमोद पिपरे, जिल्हा उपाध्यक्ष अरुण हरडे, शहराध्यक्ष तथा न.प. सभापती अनिल कुनघाडकर, महिला मोर्चा जिल्हाध्यक्ष तथा नगरसेविका योगिता पिपरे, भाजयुमो जिल्हाध्यक्ष मधुकर भांडेकर, कि.मो.जिल्हाध्यक्ष विलास भांडेकर,भाग्यवान खोब्रागडे, अनिल पोहनकर,आनंद भाऊ भांडेकर, रेवनाथ कुसराम यांच्यासह पक्षाचे विविध पदाधिकारी व कार्यकर्ते मोठ्या संख्येने उपस्थित होते. कार्यक्रमाचे संचालन भास्कर बुरे यांनी केले.

मार्गदर्शन करताना राज्यमंत्री डॉ. पंकजजी भोयर म्हणाले की, “वर्धा व भंडारा या दोन्ही जिल्ह्यांचे पालकमंत्रीपद माझ्यावर सोपविण्यात आले, हे माझ्यासाठी भाग्याचे आहे. राज्याचे मुख्यमंत्री मा. ना. देवेंद्रजी फडणवीस यांनी माझ्यावर विश्वास दाखवत ही जबाबदारी दिली, त्याबद्दल मी त्यांचा आभारी आहे.”

आपल्या राजकीय प्रवासातील कार्यकर्त्याच्या भूमिकेचा उल्लेख करताना ते म्हणाले, “मीदेखील तुमच्यासारखाच एक कार्यकर्ता म्हणून काम केले आहे. आज ज्या ठिकाणी आहे, त्यामागे संघटनेची शिकवण, कार्यकर्त्यांची मेहनत आणि सातत्यपूर्ण परिश्रम आहेत. पक्षाचा पदाधिकारी किंवा कार्यकर्ता आपल्या मेहनतीच्या बळावर पुढे जातो आणि निवडून येतो. त्यामुळे प्रत्येक कार्यकर्त्याचे योगदान अत्यंत महत्त्वाचे आहे. गडचिरोली येथे येऊन आपल्याशी संवाद साधण्याची संधी मिळणे हे माझे भाग्य आहे.”

भाजपा ही कार्यकर्त्यांच्या मेहनतीवर उभी असलेली संघटना असून, संघटन मजबूत करण्यासाठी प्रत्येक कार्यकर्त्याने एकजुटीने व समन्वयाने काम करावे, असे आवाहन डॉ. भोयर यांनी केले. केंद्र व राज्य सरकारच्या विविध लोककल्याणकारी योजना आणि विकासकामांची माहिती सामान्य जनतेपर्यंत प्रभावीपणे पोहोचविण्याची जबाबदारी कार्यकर्त्यांनी पार पाडावी, असेही त्यांनी सांगितले.

या कार्यकर्ता संवादादरम्यान उपस्थित पदाधिकारी व कार्यकर्त्यांनी आपल्या भागातील विविध प्रश्न, अडचणी, संघटनात्मक विषय तसेच जनतेशी संबंधित समस्या राज्यमंत्री डॉ. पंकजजी भोयर यांच्यासमोर मांडल्या. त्यांनी सर्वांचे म्हणणे जाणून घेत संबंधित प्रश्नांवर योग्य ती कार्यवाही करण्याचे आश्वासन दिले.

माजी खासदार डॉ. अशोकजी नेते यांच्या विशेष उपस्थितीमुळे कार्यक्रमाला विशेष महत्त्व प्राप्त झाले. गडचिरोली जिल्ह्यात पक्षाचे संघटन अधिक सक्षम करण्यासाठी पदाधिकारी व कार्यकर्त्यांनी परस्पर समन्वय, सातत्यपूर्ण जनसंपर्क आणि सेवाभावी वृत्तीने कार्य करण्याची गरज यावेळी अधोरेखित झाली.

या कार्यकर्ता संवादातून भाजपाच्या संघटनात्मक वाटचालीला नवी ऊर्जा मिळाली असून, “कार्यकर्ता हीच पक्षाची खरी ताकद” या भावनेतून गडचिरोली जिल्ह्यात पक्षाचे कार्य अधिक जोमाने आणि व्यापकपणे पुढे नेण्याचा निर्धार व्यक्त करण्यात आला.