🔸मस्कऱ्या गणपती उत्सवानिमित्त बाल कुमार मंडळ, मांगली येथे महेंद्रभाऊ ब्राम्हणवाडे यांनी सदिच्छा भेट

गडचिरोली जिल्हा ब्युरो चीफ : उज्वल देवनाथ

मस्कऱ्या गणपती उत्सवानिमित्त बाल कुमार मंडळ, मांगली, ता. नागभीड येथे महेंद्र भाऊ ब्राम्हणवाडे यांनी सदिच्छा भेट देऊन श्री गणरायाचे मनोभावे दर्शन घेतले व युवकांच्या उज्ज्वल भवितव्यासाठी शिक्षण, संस्कार, व्यसनमुक्ती आणि करिअरच्या दृष्टीने मार्गदर्शन केले.

यावेळी उपस्थित तरुण व ग्रामस्थांना मार्गदर्शन करताना महेंद्रभाऊ ब्राम्हणवाडे यांनी आजच्या युवा पिढीने व्यसनांच्या आहारी न जाता शिक्षण, ज्ञान, कौशल्यविकास आणि करिअरकडे गांभीर्याने लक्ष केंद्रित करावे, असे आवाहन केले. तंबाखू, गुटखा, दारू तसेच विविध नशेच्या पदार्थांपासून स्वतःला दूर ठेवून निरोगी व सकारात्मक जीवनशैलीचा स्वीकार करावा, असे त्यांनी सांगितले. तरुणांनी आपल्या अंगी असलेल्या क्षमता आणि प्रतिभेचा योग्य उपयोग करून समाजाच्या विकासात योगदान द्यावे, असेही त्यांनी नमूद केले.

तसेच स्पर्धा परीक्षांची योग्य नियोजनबद्ध तयारी करून शासकीय सेवेसह शिक्षण, उद्योग, क्रीडा व विविध क्षेत्रांत यश संपादन करण्यासाठी सातत्याने प्रयत्नशील राहावे, असे आवाहन त्यांनी केले. गावातील अभ्यासिकेचा योग्य व नियमित उपयोग करून तरुणांनी अभ्यासाची सवय जोपासावी, वेळेचे योग्य नियोजन करावे आणि आपल्या भविष्यातील ध्येय निश्चित करून त्या दिशेने सातत्याने वाटचाल करावी, असा प्रेरणादायी संदेश त्यांनी यावेळी दिला. तरुणांनी स्वतःच्या प्रगतीसोबतच गावाच्या आणि समाजाच्या प्रगतीसाठीही सकारात्मक भूमिका बजावावी, असेही महेंद्रभाऊ ब्राम्हणवाडे यांनी यावेळी सांगितले.

या प्रसंगी नागभीड तालुका अध्यक्ष प्रमोद भाऊ चौधरी, पुरुषोत्तमजी बगमारे, मेश्राम सर, राऊत सर, संतोष पाटील देशमुख, उपसरपंच धर्मदासजी देशमुख, तुकारामजी नवघडे, सुधाकर देशमुख, रमेशजी मालोदे, राजू मोगम, रविभाऊ देशमुख, हरबाजी नवघडे, सिद्धेश्वर कुलसंगे, पिरम देशमुख, विनायक जी गायधने सह गावकरी मंडळी, भक्तगण व मंडळातील सदस्य उपस्थित होते.