🔷 बाजारी विकलेली नार अर्थात भाड्याची बायको; नाटकाच्या प्रकाशन सोहळ्यात समीक्षण पुरस्कार प्रदान

Chief EditorJuly 6, 2026

धनराज सरपाते- तालुका प्रतिनिधी
सिंदेवाही: ( इंडिया २४ न्युज )
समाजातील महिला वरील अन्याय, अत्याचार आणि अमानुष प्रथावर भाष्य करणारे लेखक युवराज गोंगले लिखित, दिग्दर्शित तसेच शिवम थिएटर निर्मित “बाजारी विकलेली नार अर्थात भाड्याची बायको” या सामाजिक मराठी नाटकाच्या पुस्तक प्रकाशन सोहळ्यात नाट्य समीक्षक तथा पत्रकार महेंद्र कोवले यांना “समीक्षण पुरस्कार प्रदान करण्यात आला.

झाडीपट्टी रंगभूमीवर नाटकाने मोठे यश संपादन केले असून, एका हंगामात तब्बल १२० प्रयोग सादर करून नवा विक्रम प्रस्थापित केला आहे. सत्य घटनेवर आधारित असलेल्या या नाटकातून मध्यप्रदेशातील शिवपूरी जिल्हयात महिलांची बाजारात बोली लावून विक्री करण्याचा अमानुष प्रथेवर प्रकाश टाकण्यात आला आहे.

वडसा येथील आदर्श महाविद्यालयात आयोजित पुस्तक प्रकाशन सोहळ्यात, मा. आमदार रामदास मसराम यांच्या हस्ते पुरस्कार प्रदान करण्यात आला. कार्यक्रमाला झाडीपट्टी रंगभूमीचे ज्येष्ठ कलाकार पद्मश्री डॉ. परशुराम खुणे, नाट्य लेखक सदानंद बोरकर, नगराध्यक्ष लता सौंदरकर, उपनगराध्यक्ष नरेश विठ्ठलानी, ज्येष्ठ नाट्य लेखक सिद्धार्थ गोवर्धन, नंदकिशोर मसराम यांच्यासह अनेक मान्यवर उपस्थित होते.

या नाटकाच्या सामाजिक आशयाचे आणि दर्जेदार सादरीकरणाचे सर्व स्तरातून कौतुक होत असून, पुस्तक प्रकाशन व समीक्षण पुरस्कार सोहळ्यामुळे नाटकाला आणखी एक मानाचा सन्मान मिळाला आहे.