आपला जिल्हा ताज्या घडामोडी देश विदेश महाराष्ट्र

🔸फुलांच्या वर्षावात सिंधी कॅम्पमध्ये श्री संत वासुदेव महाराज पालखी सोहळ्याचे जल्लोषात स्वागत..

🔸हरिनामाच्या गजराने दुमदुमला सिंधी कॅम्प परिसर..

Chief EditorJuly 5, 2026

राज जांभुळकर : मुख्य कार्यकारी संपादक

अकोला – ( इंडिया 24 न्युज ) : दि. ३ : विठ्ठलनामाच्या अखंड गजरात, टाळ-मृदंगाच्या निनादात आणि भक्तिरसाने ओथंबलेल्या वातावरणात अकोट येथील श्रद्धासागरातून पंढरपूरच्या दिशेने प्रस्थान केलेल्या श्री संत वासुदेव महाराज पालखी सोहळ्याचे सिंधी कॅम्प येथे अत्यंत भक्तिमय आणि उत्साहपूर्ण वातावरणात भव्य-दिव्य स्वागत करण्यात आले. जेसीबीद्वारे करण्यात आलेल्या पुष्पवृष्टीने संपूर्ण परिसर भक्तिभावाच्या सुवासाने न्हाऊन निघाला आणि उपस्थित भाविकांच्या डोळ्यांचे पारणे फेडले.

ह.भ.प. वासुदेवराव महल्ले पाटील यांच्या परिवाराच्या वतीने पालखी, वारकरी आणि संत परंपरेप्रती कृतज्ञता व्यक्त करत फुलांची उधळण करण्यात आली. “ज्ञानोबा-तुकाराम”, “विठ्ठल विठ्ठल”, “श्री संत वासुदेव महाराजांचा विजय असो” अशा जयघोषांनी सिंधी कॅम्प परिसर अक्षरशः दुमदुमून गेला.

यावेळी आयोजित करण्यात आलेल्या हरिकीर्तनाने उपस्थित भाविकांना भक्तिरसात तल्लीन केले. कीर्तनानंतर श्री विठ्ठल-रुक्मिणी व श्री संत वासुदेव महाराजांची आरती संपन्न झाली. त्यानंतर सर्व वारकरी, भाविक आणि नागरिकांसाठी महाप्रसादाचे आयोजन करण्यात आले. हजारो भाविकांनी महाप्रसादाचा लाभ घेत भक्ती आणि सेवेचा संगम अनुभवला.

याच प्रसंगी सामाजिक बांधिलकी जपत सुमिरन फाउंडेशन, अकोलाच्या अध्यक्षा पूजा रमाकांत खेतान यांच्या वतीने श्री संत वासुदेव महाराज ज्ञानपीठ संस्थेच्या पालखीतील वारकऱ्यांना औषधांची किट भेट देण्यात आली. दीर्घ पायी प्रवास करणाऱ्या वारकऱ्यांच्या आरोग्याची काळजी घेण्याच्या या उपक्रमाचे सर्व स्तरांतून कौतुक करण्यात आले.

रांगोळ्यांनी सजलेले रस्ते, फुलांची उधळण, फुगड्या, अभंग, भक्तिगीते, टाळ-मृदंगाचा निनाद आणि विठ्ठलनामाच्या अखंड घोषात सिंधी कॅम्प परिसर भक्तीच्या महासागरात विलीन झाला होता. पालखीचे दर्शन घेण्यासाठी भाविकांनी मोठ्या प्रमाणावर गर्दी केली होती. महिलांपासून ज्येष्ठ नागरिकांपर्यंत आणि युवकांपासून बालगोपाळांपर्यंत सर्वच स्तरातील भक्तांनी पालखीचे दर्शन घेत आशीर्वाद प्राप्त केला.

कार्यक्रमानंतर पालखी सोहळा विठुरायाच्या गजरात अकोला शहरातून पुढे वाशीम बायपास मार्गे पुढील मुक्कामाच्या दिशेने प्रस्थान झाला. संत परंपरा, समाजसेवा आणि लोकजागृती यांचा सुंदर संगम घडविणारा हा सोहळा अकोलेकरांच्या स्मरणात कायम राहील, अशा भावना उपस्थित भाविकांनी व्यक्त केल्या.