🔸पाणीपुरवठा, आरोग्य आणि खड्डेमुक्त रस्त्यांचे आश्वासन – महेश चौधरी

डॉ. आनंदराव कुळे
मूल तालुका प्रतिनिधी
मो. क्र. ९४०३१७९७२७.

मूल – ( इंडिया २४ न्यूज ) : मूल नगरपरिषद निवडणुकीच्या पार्श्वभूमीवर शिवसेना (उ. बा. ठा.) चे नगरसेवक पदाचे उमेदवार महेश चौधरी यांनी मूल शहराच्या प्रभाग ०१ च्या सर्वांगीण विकासाची ग्वाही दिली. “प्रभागातील पाणीपुरवठ्याचा प्रश्न सोडवून नागरिकांना दररोज स्वच्छ पाणी देणे आणि शहराला संपूर्ण खड्डेमुक्त करणे हे आमचे मुख्य ध्येय असल्याचे महेश चौधरी यांनी सांगितले.

पाणी, रस्ते आणि आरोग्य—त्रिसूत्री विकासाचा रोडमॅप
महेश चौधरी म्हणाले, “शहरातील पाणीपुरवठा योजनेचे पुनरुज्जीवन करणे, नवीन योजनेची अंमलबजावणी करणे आणि नागरिकांना रोज पाणी उपलब्ध करणे हे आमचे प्रथम प्राधान्य आहे. भूमिगत गटारांचे जाळे तयार करणे, नाल्यांचे काँक्रिटीकरण, मॉडेल रोडची निर्मिती आणि रस्ता खड्डेमुक्त करणे हे काम युद्धपातळीवर करण्यात येईल.”
तसेच, रखडलेल्या डीपी रस्त्यासह अपूर्ण राहिलेले विकासकामे पूर्ण करण्याचा निर्धारही त्यांनी व्यक्त केला.

डिजिटल तक्रार निवारण ची घोषणा
शहरात पारदर्शक प्रशासन आणण्यासाठी डिजिटल ॲप सुरू करणार असून, या ॲपद्वारे दाखल केलेल्या तक्रारी आठ दिवसांत सोडवण्याचे आश्वासन देण्यात आले.
“ शहरातील आरोग्य सेवा अधिक सक्षम केल्या जातील. महिलांसाठी, बालकांसाठी आणि ज्येष्ठांसाठी आधुनिक उद्यानांची निर्मिती करून शहराचे सौंदर्य वाढवले जाईल,” असे महेश चौधरी म्हणाले.
दीर्घकाळ प्रलंबित असलेले प्रश्नही प्राधान्याने मार्गी लावण्याचा निर्धार त्यांनी व्यक्त केला.

‘मैत्रीपूर्ण लढत’; स्थानिक मुद्द्यांवर भर प्रभाग ०१ मधील लढतीबद्दल विचारले असता महेश चौधरी म्हणाले, “नगरपरिषद निवडणूक स्थानिक मुद्द्यांवर लढली जाते. त्यामुळे येथे स्थानिक विकासाच्या दृष्टीने मैत्रीपूर्ण लढत होत आहे.”
एकंदरीत महेश चौधरी यांच्या प्रचाराचा झंझावात जोरात सुरु आहे.